DILI

SEII enkoraja feto kompete iha eleisaun munisipál no parlamentár 2023

SEII enkoraja feto kompete iha eleisaun munisipál no parlamentár 2023

Feto potensiál sira iha munisípiu Covalima selebra loron mundiál feto. Imajen Tatoli/Celestina Teles.

DILI, 22 setembru 2022 (TATOLI)—Diretora Unidade Feto ba Dezenvolvimentu iha Sekretária Estadu Igualdade no Inkluzaun (SEII), Bendita de Jesus Amaral, enkoraja feto sira atu kompete iha eleisaun munisipál no parlamentár ne’ebé mak sei realiza iha tinan 2023.

“Feto labele tauk maibé ho kapasidade no abilidade ne’ebé hetan hodi bele kompete ho mane iha eleisaun parlamentár no eleisaun suku sira iha tinan oin,” nia dehan ba jornalista sira iha, salaun Delta Nova, Dili, kinta ne’e.

Feto sira labele tauk katak kompete ba mak ema la tau fiar, tanba manán ka lakon ne’e fila ba kompeténsia maibé fiar an ho kapasidade no skill ne’ebé iha hodi kompete iha eleisaun sira no foti desizaun ne’e importante.

Diretora Nasionál Abordajen Integradu, Kapasitasaun Feto (DNAIJKF-SEII), Maria Filomena Babo Martins, kontinua motiva feto potensiál sira atu prepara-an hodi kompete ho mane iha eleisaun ne’ebé realiza iha tinan 2023.

“Ita haree agora daudaun iha baze, ita iha ona 5% feto iha baze kompara ho 452 suku ne’ebé mak iha mínimu liu, ida-ne’e ba eleisaun suku nian maibé ba eleisaun parlamentar ita hakarak feto potensiál preparadu sira-nia an ba eleisaun 2023. Iha eleisaun parlamentár feto sei envolve no partisipa no prepara sira-nia an atu bele ba kualker posizaun ne’ebé sei akontese iha 2023,” Diretora Maria hateten.

Kona-ba Eleisaun Parlamentár no Suku SEII iha programa rua ba kapasitasaun iha eleisaun sira iha tinan 2023 nian, programa ida ko’alia liu kona-ba assuntu igualdade jéneru no inkluzaun sosiál ida-ne’e prapara liuhosi Dirasaun Nasionál Jerál Jéneru halo liuhosi empoderamentu sosiu-ekonómiku no promosaun partisipasaun feto iha politika.

Nia hatutan, dirasaun ne’e mós servisu hamutuk ho NGO ne’ebé mak luta ba direitu feto hanesan Patria, MOFFE, CAUCUS, No MAE halo ona formasaun, soensibilizasaun oinsá kapasita feto potensiál sira atu partisipa iha eleisaun ne’ebé sei hala’o iha tinan 2023.

Nia hatutan, formasaun fó ba feto potensiál sira-ne’ebé iha munisípiu 13 inklui mós Rejiaun Administrativu Espesiál Oé-Cusse Ambeno (RAEOA),

“Ida-ne’e sai hanesan alvu atu feto potensiál sira prepara sira-nia aan di’akliu iha eleisaun mai ne’e,” nia dehan.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!