iklan

EKONOMIA, HEADLINE

TANE Konsumidór introdús peskiza folin nesesidade bázika iha loja 21

TANE Konsumidór introdús peskiza folin nesesidade bázika iha loja 21

Prezidente Assosiasaun Tane Konsumidór, António Ramos da Silva ‘Naikoli’. Imajen Tatoli/Francisco Sony

DILI, 23 setembru 2022 (TATOLI)-TANE Konsumidór, sesta ne’e, halo lansamentu peskiza folin sasán nesesidade bázika iha loja iha Dili laran.

“Dilimart oferese cabaz ai-han baratu liu ba timor-oan sira. TANE kontinua ajuda konsumidór sira atu hetan folin kiik liu iha merkadu. Iha fulan-agostu, halo vizita ba loja 21 iha Dili no ekipa hetan cabaz baratu liu ho folin $56,20 no karun liu ho folin $72,35. Tendénsia jerál hosi aumentu folin ne’e hanesan nafatin ho fulan-abril liubá, ne’ebé maka cabaz sira varia entre $47,06 ho $66,60, ka ninia variasaun ne’e 29%,” Prezidente Asosiasaun Tane Konsumidór, António Ramos da Silva ‘Naikoli’, fó sai rezultadu peskiza ne’e iha salaun enkontru TANE Konsumidór, Vila-Verde.

Cabaz ai-han ne’e kompostu hosi produtu 21 ne’ebé maka inklui foz, fariña, na’an (ikan, na’an-manu, salsisa, na’an-fahi, no na’an-karau), masmidar, manteiga, mina, susu-been rahun, manu-tolun, ai-fuan (masan no sabraka), modo tahan (fehuk roupa,senoura, no tomate) inklui bebida alkólika no la’ós alkólika(cola, sumu ho gás, sumu la ho gás, no serveja).

Notísia relevante: ANC no TANE Konsumidór asina akordu kooperasaun proteje direitu konsumidór

Ekipa rekolla folin iha loja 21 iha loron 22 to’o 26 agostu, ne’ebé antes ne’e hala’o ona dezde tinan 2020 no TANE ninia objetivu maka atu ajuda konsumidór sira hatene iha ne’ebé maka bele hetan produtu baratu liu, atu nune’e bele halo planu di’ak bainhira atu hola sasán no bele hili ho loloos.

Dilimart oferese cabaz ai-han baratu liu, iha fulan-agostu, oferese cabaz ho folin $56,20 no cabaz ne’ebé karun liu maka iha Family First (Hudi-laran) atinji folin $72,35 ba produtu ai-han ne’ebé maka hanesan, ho diferensa $16,15, haree ba kbiit atu hola sasán hosi timoroan sira signikativu tebes.

“Fó hanoin katak folin hosi cabaz ne’e valór globál. Importante atu hatene folin hosi produtu sira idaidak ka ketak-ketak tanba bele hetan folin kiik liu. Ezemplu foos kilograma 20 baratu liu iha Leader (Comoro) $13,50, iha Grasa shop (Comoro) folin kiik liu ba na’an manu kada kilograma $2,50, na’an-karau folin kiik liu iha Phoenix 368 (Akait) $6, ba masan no fariña baratu liu iha Seara (Centrál) kada kilograma $1 ba produto rua ne’e.

Hosi produtu sira hotu ne’ebé maka analiza, iha 12 maka folin sa’e ne’ebé maka bele to’o 45%, hanesan sabraka $1,45, hanesan mós na’an-manu $2,5, kombong $1,70, masmidar $0,85 no mina $4,25 sira maka entre produtu sira ne’ebé bele aumenta a’as liu 20% dezde estudu ikus iha abril 2022.

“Importante tebes atu konsumidór hetan informasaun didi’ak no halo komparasaun ba folin produtu sira hodi halo kompra. Ho tabela ba folin sira hosi TANE, ita boot sira bele poupa barak liu tan duke $16,15. Nune’e, molok hola sasán ba ita-nia família importante halo lista ida atu ba hola sasán tuir ho ita-nia nesisidade sira, aproveita hodi planeia ai-han ba semana nian, hili loja ka estabelesimentu ne’ebé maka adekuadu, kompara folin sira, le rotulu ka label, verifika prazu validade no haree didi’ak promosaun sira,” nia fó hanoin.

Nune’e, ho modu ida-ne’e bele evita hola sasán barak liu no kombate ba desperdíziu ai-han sira ne’ebé maka bele sai a’at liután. Tenke tau atensaun ba loron validade produtu ai-han ne’ebé maka iha promosaun, bele sai hanesan oportunidade atu poupa karteira maibé labele husik liuliu prazu.

“TANE hala’o knaar hodi informa ho apoiu konsumidór sira, tanba ne’e se iha dúvida kona-ba imi-nia direitu, se la satisfeitu bainhira hola sasán ruma ka hakarak eklaresimentu ruma ba kestaun ne’ebé maka iha ligasaun ho konsumu, koalia mai ami. Ami iha Sentru Atendimentu Konsumidór,” nia apela.

Fó hanoin filafali katak, TANE Konsumidór ninia misaun maka defende lejítimu interese no direitu konsumidór hotu iha Timor-Leste, laiha destinsaun, garante ba moris, saúde no seguransa no kualidade sasán inklui servisu sira.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!