iklan

EKONOMIA, BOBONARO, HEADLINE, MUNISÍPIU

MAP Bobonaro prepara tratór 13 iha époka 2022

MAP Bobonaro prepara tratór 13 iha époka 2022

Diretór Servisu Agrikultura no Peska Munisípiu Bobonaro, Alberto da Costa Lopes. Imajen Tatoli/Sérgio da Cruz.

BOBONARO, 28 setembru 2022 (TATOLI)-Ministériu Agrikultura no Peska liuhosi diresaun agrikultura munisípiu Bobonaro, prepara ona tratór hamutuk unidade 13 atu fasilita fila-rai iha agrikultór munisípiu Bobonaro nia to’os atu halo produsaun batar iha époka 2022.

Diretór agrikultura munisípiu Bobonaro, Alberto da Costa Lopes, esplika, daudaun ne’e iha hela tratór hamutuk unidade 35, maibé hosi númeru ne’e iha sia mak kondisaun grave no para hela atu halo manutensaun ne’ebé iha hela faze ba atu halo leilaun.

Notísia relevante: MAP husu komunidade Bobonaro kolabora dezenvolve área kultiva

“Ami halo ona preparasaun ba iha époka rai-maran batar ninian, ita prepara kondisaun ba ekipamentu hanesan tratór agora halo ona manutensaun, ne’ebé hahú agora ba oin ne’e ita iha tratór 13, boot hitu, médiu iha neen, ne’e prontu hela atu halo operasaun,” nia informa ba Tatoli, iha Maliana, kuarta ne’e.

Alberto akresei, prosesu atendimentu diresaun agrikultura sei prepara lista depois komunidade agrikultór sira mai rejista ninia área lokalidade to’os inklui rai ektare hirak mak presiza atu fila.

Jafoin rekolla dadus hirak-ne’e mak foin orienta operadór sira bele tún ona ba terrenu atu responde tuir nesesidade.

Iha tempu bailoron normalmente hanesan kada tinan diresaun sei pasa informasaun  ba iha postu administrativu sira nivél suku, hodi submete fali pedidu mai postu elabora nune’e bele hatutan mai diresaun munisipál hafoin koloka tratór bazea ba pedidu.

“Hanesan bainbain ba Balibo ita sempre koloka tán rua, ba Cailaco rua, restu perkore hotu iha Maliana, tanba Maliana iha poténsia ne’e boot liu entaun ita prepara kompara ho postu sira seluk,” nia katak.

Maibée daudaun ne’e seidauk bele mobiliza tratór hirak-ne’e ba terrenu, tanba kombustível ne’ebé governu apoia sei iha prosesu diskusaun nível altu nian ligadu ho folin mina ne’ebé sa’e maka’as, maibé garante sei apoia iha tempu badak.

“Ami sei halo preparasaun batar nian, ne’e mak ami koordena ona ho asosiasaun prodús fini, depois to’o ona tempu ita bele distribui fini, alende ne’e ami mós kontinua halo preparasaun ba iha natar époka primeiru nian kona-bábá fini, kumbustível no ekipamentu sira tanba besik ona tempu udan monu rai serbisu hotu bele la’o ho di’ak,” nia dehan.

Nia apela ba komunidade agrikultór munisípiu Bobonaro atu badinas halai natar no halo to’os nune’e bele hasa’e kuantidade produsaun agríkola iha rai laran, hodi hakbiit ekonomia família no nasaun.

Notísia relevante: MAP ke’e ona kanál irrigasaun tradisionál iha Tapo-Memo

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!