Kazu motorista karreta funeráriu husu osan ba família matebian iha prosesu investigasaun

DILI, 29 setembru 2022 (TATOLI)–Diretór Nasionál Asisténsia Sosiál (DNSA), Lucas Tois, hateten kazu deskonfia motorista karreta funeráriu husu osan ba família matebian ida iha Dili ne’e sei iha hela prosesu investigasaun.
“Kona-ba kondutór husu osan ba família matebian ne’e ami hato’o ona ba ami-nia Diretór Jerál MSSI atu halo audit ba problema ne’e, tanba ema barak ko’alia entaun husik audit para ema hatane katak loos ka la loos,” Lucas hateten ba Agência Tatoli, liuhosi telefone, ohin.
Diretór ne’e hateten, investigasaun ba kazu ne’e la’o hela no iha prosesu investigasaun, ne’e la’ós investiga de’it kondutór maibé ema ne’ebé ka família matebian ne’ebé selu karreta ne’e, nune’e atu hatene loos kazu ne’e katak loos ka lae.
Bainhira loos, nia dehan, funsionáriu ne’e sei tuir prosedimentu balun nune’e daudaun ne’e iha audit nia-laran.
“Tanba ami-nia regra iha ne’e la eziste buat ida husu osan ne’e, tanba osan perdiem ho mina oferese hela ba karreta no mós osan ba kondutór ne’e iha. Nusa mak ba husu tan,” nia dehan.
Nia dehan, mate iha Dili laran ambulansia pikete mak mobiliza hosi ospitál ba matebian nia uma durante oras 24 nia-laran.
Maibé karik desloka ba munisípiu sai dadeer tuku 07h00, lorokraik tuku 18h00 ba leten ambulansia sei la halo movimentu ka mobilizasaun kalan tanba kondutór kolen, nune’e bainhira tula mate-isin ida ba munisípiu tenke loron.
“Ezetu kazu asidente ruma ka oho malu ruma ne’ebé mak polísia akompañia entaun ita tenke ba foti tanba mate asidente ita labele hein,” nia dehan.
Jornalista : Osória Marques
Editór : Cancio Ximenes

