Top

Timor-Leste presiza laboratóriu ida atu koko kualidade ai-han

Negosiante sira iha Merkadu Liquiça fa'an hela modo-tahan no ai-fuan sira Imajen Tatoli/Hortencio Sanchez

DILI, 13 outubru 2022 (TATOLI)—Koordenadór Rede HASATIL (ONG), Gil Boavida, husu ba Governu atu kria laboratóriu ida-ne’ebé bele koko kualidade produtu ai-han iha nasaun ne’e.

“Timoroan barak mak konsume ai-han lalais, tanba ne’e ami husu ba Ezekutivu atu kria laboratóriu ida-ne’ebé bele koko kualidade produtu ai-han nian, liu-liu importadu sira. Presiza koko sira molok fahe ba merkadu atu faan,” Gil Boavida hateten iha konferénsia imprensa, iha Faról, Dili, kinta ne’e.

Koordenadór ne’e mós apela ba populasaun atu labele han ai-han ne’ebé lais (instan) tanba ida-ne’e kauza saúde públika.

Nia fó-hanoin katak autoridade inspesaun no fiskalizasaun ba atividade ekonómika, sanitária no ai-han (AIFAESA) identifika ona ai-han no fó hanoin fila-fali katak Governu Timor-Leste, organizasaun ai-han no Agrikultura Nasaun Unida (FAO) no organizasaun Mundiál saúde (OMS), lansa ona iha fulan-marsu tinan ida-ne’e, projetu KAK nian dahuluk iha país ne’e, ho valór rihun $220 ba tinan tolu oin mai atu bele hetan seguransa ai-han.

Prezidente Komisaun KAK nian iha Timor-Leste, Odete Viegas, subliña importánsia partisipasaun Timor-Leste nian iha KAK atu defende direitu konsumidor sira liu-liu kona-ba protesaun saúde publika.

“Ita presiza sensibiliza komunidade rurál kona-ba risku ai-han, kona-ba importánsia hosi kualidade ai-han no padraun ai-han adoptadu internasionál. Ita presiza proteje konsumidor sira-nia saúde,” Odete Viegas hateten.

Odete Viegas hatutan, ba projetu ne’e Fundu Fiduciário do Codex nian fornese montante ida ho valór $140.000, ne’ebé organizasaun Mundiál Komérsiu nian kontribui $70.000 no Governu Timor-Leste kontribui ona $10,000.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!