PITL konklui manuál alterasaun klimátika hodi integra ba kurríkulu eskolár

DILI, 04 setembru 2022 (TATOLI) – Plan International Timor-Leste (PITL) kompleta ona preparasaun manuál ida kona-ba alterasaun klimátika, ne’ebé sei inklui iha kurríkulu eskolár, ho objetivu atu profesór no estudante ensinu primáriu no sekundáriu bele implementa manuál ida ne’e.
“Iha abríl, ami konklui dezenvolvimentu manuál ba mudansa klimátika ba profesór no estudante sira. Ami envolve reprezentante hosi Plan International hosi irlándia no Austrália no Ministériu Edukasaun, Juventude no Desportu (MEJD), iha servisu ida-ne’e hodi halo revizaun ba konteúdu ne’e”, Jestór projetu PITL, Julmiro Isac Manuel, ba Tatoli, iha Bairro Grilos.
Responsável ne’e esplika katak manuál ne’e halo bazea ba realidade eskola no kondisaun ambientál iha Timor-Leste no iha mundu no mós iha área disiplina siénsia naturál nian.
Tuir jestór, profisionál sira hosi PITL, Uniaun Europeia no Governu aprezenta ona manuál ne’e ba Universidade hothotu iha Dili, iha semináriu ida molok aprezenta ba MEJD atu aprova.
Nia garante katak manuál ne’e sei ajuda atu muda alunu sira-nia hanoin kona-ba oinsá atu tau matan ba prezervasaun ambientál iha sosiedade ida-ne’ebé saudável.
“Konteúdu livru ne’e nian fó ba esplorasaun sustentável rekursu naturál planeta nian atu hadia kualidade moris nian ba jerasaun futuru”, dehan julmiro Isac Manuel.
Julmiro nota katak PITL fornese ona manuál ba MEJD liu 300.
Elaborasaun manuál, nia dehan PITL hamutuk ho Institutu Nasionál formasaun dosente no profisionál Edukasaun Timor-Leste nian no ho Institutu superiór Cristal no fó ona formasaun ba profesór na’in 40 iha munisípiu Aileu no Ainaro kona-ba konteúdu manuál ba estudante sira ne’ebé mak atu hanorin.
Manuál ne’e iha kapítulu tolu no foka ba konteúdu sira hanesan: fonte enerjia no matemátika, rekursu naturál renovável no naun renovável no salvaguarda ambiente. Kapítulu sira-ne’e mós esplika tópiku sira hanesan: mudansa klimátika, efeitu estufa, evidénsia warming globál no efeitu husi mudansa klimátika.
Jornalista: Osória Marques
Editór : Zezito Silva

