Polítika resiklajen ba lixu paradu iha Timor-Leste

DILI, 05 outubru 2022 (TATOLI) – Resiklajen ba lixu paradu iha tinan kotuk tanba Ministériu Administrasaun Estatal (MAE) la prevé orsamentu, salienta Diretór Servisu Munisipál Agua Saneamentu no Ambiente, Hermínio Moniz Ribeiro.
Diretór rekorda MAE liuhosi Dirasaun Nasionál Organizasaun Urbana implementa ona programa resiklajen nu’udar programa pilotu iha suku haat, hanesan iha Motael, Kampung Alor, Caicoli no Colmera, maibé programa ne’e la la’o no atu la’o fali mós kompeténsia MAE no ezekutór mak Administrasaun Munisípiu Díli.
“Resiklajen paradu iha tinan kotuk ne’e kedas tanba orsamentu MAE nian iha altura ne’ebá la aloka osan ba servisu sira hanesan, jardin nian inklui outru servisu diversu mós la aloka ona, ne’e tanba kestaun diskusaun orsamentu iha altu nível ne’ebé lakohi aloka ona oramentu ba ida-ne’e nian. Maibé ha’u hanoin ida-ne’e polítika MAE nian”, Hermínio ba Ajénsia Tatoli, iha ninia knaar fatin, Matadouro, kuarta ne’e.
Antes ne’e, Dirasaun Nasionál Organizasaun Urbana serbisu hamutuk ho Programa Nasaun Unida ba Dezenvolvimentu (UNDP-sigla Ingléz) hodi halo resiklajen iha parte Igreja Motael, Colmera, Kampung – Alor no Caicoli, maibé seidauk hatudu rezultadu ne’ebé di’ak tanba ema uitoan de’it maka prodús lixu sira-ne’e sai produtu ida.
Maibé resiklajen ba lixu nesesáriu tebes tanba sasan sira ne’ebé konsideradu lixu bele sai sasan ne’ebé útil
“Resiklajen ba lixu tenke iha tanba haree ba lixu sira hanesan botir, áqua mamuk , plástiku, vidru no lixu seluk tan hanesan produtu ne’ebé bele sai sasán ne’ebé útil. Maibé ami ne’e implementadór no iha kompeténsia polítika nee MAE nian tanba ita presiza polítika ida hodi haree lixu sira-ne’e labele ba hotu Tibar maibé lixu sira ne’e ita bele utiliza ka transforma sai fali produtu ida ita bele fa’an fali no uza”, katak.
Tuir nia, bainhira iha polítika resiklajen, lixu sira iha Dili laran ne’ebé butuk iha Tibar komesa redús ona.
Maibé nia dehan, ida ne’e fila-fali ba MAE nia polítika atu oinsá mak iha polítika atu bele redúz no minimiza lixu iha lixeiru Tibar nian. Enkuantu programa ne’e rasik termina ona iha tinan 2021.
Jornalista : Osória Marques
Editór : Zezito Silva

