Xefe Departamentu SAMES Maliana husu jestór sira jere didi’ak ai-moruk

BOBONARO, 06 outubru 2022 (TATOLI) – Xefe Departamentu Servisu Autónomu Medikamentu Ekipamentus Saúde, Institutu Públiku (SAMES,I.P sigla portugés), Rejionál Maliana, Luis Sequeira Bobo, husu husu jesór saúde públika iha munisípiu Bobonaro atu jere didi’ak ai-moruk nune’e sufisiente ba pasiente sira.

Notísia relevante: Ai-moruk tipu 257 hahú mamuk iha armazén SAMES

“Ha’u husu ba sira, wainhira ai-moruk laiha tenke hato’o pedidu mai, sira mós tenke uza ai-moruk ho kuidadu, tanba ita-nia ai-moruk ne’e tama la tuir tempu, dalaruma sei iha prosesu to’o klaran mai aimoruk laiha. Ida-ne’e mak ita tenke kontrola nafatin ita-nia estoke ai-moruk,” nia informa ba jornalista sira iha bairru pemancar, suku Lahomea.

Luis haktuir, estabelesimentu SAMES rejionál Maliana iha kompeténsia halo distribuisaun ai-moruk no medikamentu saúde ba de’it Hospital Referál Maliana no servisu saúde munisípiu Bobonaro kobre hotu sentru saúde no postu saúde sira-ne’ebé estabelese ona iha suku.

Distribuisaun ai-moruk bazea ba pedidu ne’ebé submete, maibé SAMES mós sei halo kalkulasaun ho estoke ai-moruk ne’ebé mak disponivel iha armazein.

“Sé estoke iha-ne’e disponivel hela, ami sei atende bazea ba sira-nia kuantidade ne’ebé propoin iha pedidu, maibé kuandu ai-moruk iha-ne’e ninia kuantidade menus hela, ami tenke ko’a tiha atubele rezerva ba iha fasilidade saúde sira seluk,” nia katak.

Daudaun ne’e item ai-moruk esensiál sira ba medisina nian mak menus iha armazein SAMES rejionál Maliana, maibé daudaun ne’e parte sentrál halo hela prosesu kompra.

“Ami nafatin komunika ho SAMES sentrál, bainhira ai-moruk ne’e tama, ami ba foti kedas depois distrbui kedas ba fasilidade saúde sira-ne’ebé presiza, maibé agora ne’e estoke ai-moruk sei sufisiente hela, só iha item balun mak sei iha estoke out hela,” nia hatutan.

Funsionariu iha SAMES rejionál Maliana iha na’in-tolu, komposta hosi xefe departamentu, ofisiál farmasista no na’in-ida motorista.

“Ha’u hanoin ami na’in-tolu ne’e sufisiente hela, karik ba oin ami preszia tán atu aumenta, tanba ita la hatene, aban bainrua kuandu ita hasoru moras ruma, ita tenke ema ruma atubele halo serbisu,” nia akresenta.

Notísia relevante: SAMES husu responsavel fasilidade saúde jere ai-moruk báziku ho di’ak

Jornalista   : Sérgio da Cruz

Editór         : Evaristo Soares Martins