VIQUEQUE, 09 outubru 2022 (TATOLI) – Família hosi saudozu Lamberto Alves kodigu “Falur Buigue” entrega saudozu ninia restu mortál ba uma mahon, Ue-Kfia Postu Adiministrativu Lacluta, Munisípiu Viqueque.
Alin hosi saudozu, Manel Alves Amaral, hateten saudozu ninia restu mortal, família hamutuk komisaun rekolla ona saudozu ninia restu mortal, agora kontinua entrega ba Governu hosi halot iha uma mahon Ue-Kfia, Postu Lacluta.
“Ami família entrega ona ami-nia maun ninia restu mortál ba Governu hodi rai iha uma mahon Ue-Kfia, Postu Lacluta hafoin Governu kria fatin maka halot.
“Ami família sente triste lakon maun diak ida, iha funu livertasaun ida-ne’e. Ha’u rona liafuan ikus hosi ha’u-nia maun, iha momentu situasaun difisil iha Aitana. Iha momentu ne’eba hahan mós laiha ona nune’e ha’u maun fó hatene ha’u lori fila ha’u-nia aman inan sira ba vila hodi buka moris tinan 1977, husik ha’u maka luta iha ailaran. Entaun iha momentu ne’e ami fila tiha mai Viqueque ikus mai ami rona ami-nia maun ema oho”, Manel Alves Amaral, hateten ba jornalista sira, iha uma mahon Ue-Kfia, Postu Lacluta, domingu ne’e.
Nia husu ba Governu kria ona fatin jardin hodi halot restu mortál iha fatin ne’ebé dignu tanba saudozu sira oferese sira-nia vida moris tomak ba luta libertasaun.
“Tanba to’o agora Postu Lacluta Governu seidauk kria kondisaun jardin. Tan ne’e maka ami nafatin husu Governu hodi kria kondisaun”, nia hato’o.
Saudozu Falur Buigue ninia kontribuisain ba luta libertasaun. iha 2008 Governu rekoñese ona saudozu. Saudozu mate ho vida klosan.
Biografia
Saúdozu Lamberto Alves “Falur Buigue” moris iha Uma-Tolu loron 15 fulan juñu 1953, amán Antonio Soares, inan Cassa Rato, saudozu oan dahuluk hosi maun alin hamutuk na’in-ualu kompostu hosi mane na’in-3 no feto na’in-5.
Saudozu Falur Buigue hahú eskola iha Nuu Laran, suku Lacluta antigu Lacluta. Depois saudozu kontinua eskola iha postu Lacluta primeiro ano no segundo ano iha postu Lacluta tinan 1960.
Nune’e saudozu kontinua aprende área karpintieru iha postu Viqueque Villa no kontinua aprende karpinteriu iha Postu Vamasse. Hafoin ida-ne’e saudozu tama tropa iha tinan 1974 segundu turnu, maibé la ramata tanba mosu Golpe mosu iha Timor Leste.
Iha 1975 saudozu koloka ba rejiaun Baucau hodi responsável kampu aviasaun asume knaar nu’udar komandante sesaun. Bainhira saudozu passa ferias ho família, militár Indonézia hahú domina rejiaun Baucau no Viqueque. Komandadu hahú bolu forsa sira konsentra hamutuk hodi kaer kilat fila fali hodi hala’o serbisu iha vizilánsia iha Wetuku no Bunos mean Brigada-DDN.
Tinan 1976 mai deskansa ferias ho família, asume grupu sivíl hanesan delegadu aldeia hosi hasai komunidade hosi sira-nia uma kunua ba aldeia. Saudozu hosi knar delegadu ba fali forsa Brigada soke.
Iha loron 1 fulan janeiru 1978 saudozu tama inimigu nia embuskada hamutuk ho ninia maluk sira na’in-neen ema oho hotu iha area Aitana Wailadodo. Saudozu na’in-neen sira-nia mate isin la hakoi, husik letet de’it.
Durante ne’e saudozu nia mate, husik hela de’it iha ailaran durante tinan 44 nian laran. Família hosi saudosu Falur Builogue hamutuk ho komisaun ba rekolla restu mortál iha loron 3 fulan jullu tinan 2022 lori saudozu ninia restu mortál iha Aitana, hodi tau iha Uma Mahon Ue-Kfia.
Jornalista: Vitorino Lopes da Costa
Editór : Zezito Silva
