DILI, 10 outubru 2022 (TATOLI) — Konsuladu RDTL iha Kupang repatria ona, Lutgardia Elconsenza Alves Jerónimo ho idade tinan 5, entrega ona ba nia inan Nelia Maria José Alves iha Timor-Leste.
Tanba Durante ne’e labarik Lutgardia sai ona disputa husi nia inan Nelia Maria Jose Alves ho aman Júlio António Dude Jerónimo.
Kazu ne’e lori to’o ba iha Tribunál Distritál Dili (TDD) no desizaun hosi TDD iha loron 24 Setembru 2020, afavor Nelia Maria Jose Alves hanesan inan ba oan ba labarik idade ho minoridade. Maibé infelizmente nia avo feto ho avo mane lori no asegura hela iha Kupang-Indonézia.
Ida-ne’e akontese tanba bazea ba pedidu hosi nia inan Nelia Maria Jose Alves ba MNEK atu koordena ho Misaun RDTL iha Indonézia (Embaixada no Konsuladu) atu bele halo aprosimasaun ho labarik nia avo feto ho avo mane atu bele autoriza labarik fila fali mai Timor-Leste, tuir desizaun Tribunál ne’ebé mak iha ona.
Tuir Sekretáriu Jerál Ministériu Negósiu Estranjeiru no Kooperasaun, Francisco Tilman Capeda, hateten prosesu ne’e servisu bilaterál entre Timor-Leste ho Indonézia
“Prosesu sira-ne’e akontese tanba ita servisu hamutuk ho relasaun di’ak entre Indonézia no Timor-Leste mak ohin loron ita entrega ona ba nia inan iha Timor-Leste”, Sekretáriu Jerál MNEK dehan ba jornalista bainhira repatria labarik ba nia inan, iha Praios dos Coqueiros, Dili, segunda ne’e.
Embaixadór Indonézia ba Timor-Leste, Okto Dorinus Manik, dehan parte hotu nia kolaborasaun no halo komunikasaun liuhosi telefone ho labarik nia avo mak nia rezultadu ikus mak entrega ba nia inan.
“Ida-ne’e ami rezolve tuir família no ami lakohi halo ho peranan hukum, ho poder ka obriga sira. Maibe ha’u espera katak ho labarik fila ona mai ne’e, la’ós hotu ona iha ne’e, maibé nafatin halo kantaktu bainhira ninia avo hakarak atu vizita nia bei-oan, tenke fasilita malu”, nia dehan.
Inan hosi labarik, Nelia Maria Jose Alves, ho matan-been iha nia matan, hako’ak nia oan-feto no agradese ba sira hotu ne’ebé fasilita prosesu ne’e.
Ho ida-ne’e, Maria José Alves, hakarak agradese ba Organizasaun Asisténsia Legál Feto no Labarik (ALFeLa), Asia Justice and Rights (AJAR) ne’ebé suporta no apoiu hodi ohin loron labarik to’o iha ne’e.
“Ha’u agradese tebes ba ALFeLa ho AJAR no mós Kedutaan Besar Republik Indonesia (KBRI) no Ministériu Negósiu Estrajeiru no Kooperasaun (MNEK) ne’ebé mak suporta no apoiu ho laran luak, hodi lori fila ha’u-nia oan mai Timor-Leste,” Nelia dehan.
Filomena Pinheiro, labarik nia avo, esplika katak nia kuida ona nia bei-oan desde tinan 2018 iha Kupang, Timor Osidentál, tanba nia oan-mane, Julio António dude Jeronimo no feto foun, Nelia Maria Jose Alves, tanba laiha ema ne’ebé mak atu hein.
“Entrega bei-oan ne’e hosi ha’u-nia feto foun no labarik nia-aman (Julio António dude Jeronimo) tanba kaben ona ho feto seluk. Ha’u tau matan ba nia husi tempu ne’ebé nia sei ki’ik,” Filomena Pinheiro haktuir ho sentimentu triste, iha serimónia repatriasaun ne’ebé hala’o ohin iha MNEC. Praia dos Coqueiros.
Jornalista : Osória Maruqes
Editór : Zezito Silva
