DILI, 11 outubru 2022 (TATOLI)—Organizasaun Mundiál Saúde (OMS) iha Timor Leste, apoia orsamentu rihun $11 ba Ministériu Saúde atu selebra loron mundiál saúde mentál iha Rejiaun Administrativu Oé-Cusse no Ambeno (RAEOA).
“Iha tinan ne’e, Ministériu saúde aloka rihun $7 ba programa selebrasaun saúde mentál , hosi fundu ne’e la sufisiente, nune’e OMS apoia tan rihun $11 hodi bele realiza selebra loron mundiál saúde iha RAEOA,” hateten Responsavél Programa Saúde mentál iha Ministériu Saúde, Julio Kehic Tilman, iha Lahane-Dili, ohin.
Notísia relevante:Família presiza apoia pasiente ema ho defisiénsia mentál hodi bele rekupera
Nia dehan, horiseik loron mundiál saúde mentál nian, maibé ho difikuldade jestaun, nune’e MS la konsege selebra no adia fali ba loron seluk iha fulan outubru iha RAEOA.
Nune’e, Ministériu Saúde fó mensajen ba komunidade sira iha Timor laran tomak katak loron mundiál saúde mentál ne’e hanoin hikas fali pasiente sira ne’ebé mak mate tanba sofrimentu mentál.
MS sei hala’o atividade advokasia ba lideransa komunitariu no pesoál saúde iha RAEOA hodi bele hamutuk atende ema ho moras mentál.
“Ita haree pasiente saúde mental sira la’o la di’ak, profisionál saúde sira tenke ba vizita iha nia-uma hodi fó tratamentu ba sira,” nia akresenta.
Tuir dadus hosi Ministériu Saúde rejista ema ho moras mentál, bazeia ba sensus 2015 iha territóriu nasionál hatudu katak iha 1% mak durante ne’e hetan tratamentu husi profisionál saúde.
Notísia relevante: Moras Mentál Tenke Submete ba MS
Jornalista : Felicidade Ximenes
Editór : Florencio Miranda Ximenes
