DILI, 13 outubru 2022 (TATOLI)—Reprezentante Organizasaun Rezisténsia Nasionál Estudante Timor-Leste (RENETIL), José das Neves “Samalarua” hateten, Estadu presiza estabelese norma no prosedimentu hodi asegura atividade ne’ebé mak la afeta vida ekonómika povu nian iha Timor-Leste.
“Tanba bainhira nia utilizasaun ka transferénsia tama iha montante ne’ebé boot, Estadu presiza estabelese norma no prosedimentu hodi asegura katak atividade ida hanesan ne’e la afeta ba vida ekonómika povu nian no la hasusar Estadu atu halo dezenvolvimentu sosiál no ekonómiku nasaun nian, no labele hafoer Estadu nia imajen iha públiku ka iha komunidade internasionál,” Reprezentante RENETIL ne’e hateten iha konferénsia imprensa, iha sede RENETIL, Dili, kinta ne’e.
Ho kontestu hirak-ne’e mak RENETIL hakarak hato’o ba instituisaun Estadu sira-ne’ebé hametin lei no orden, nune’e sira-ne’ebé mak servisu iha liña frente bele prevene no kombate krime rganizadu no krime seluk, ba ukun-na’in sira, partidu polítiku, mídia no ba públiku ein-jerál kona-ba tentativa lori osan ba estranjeiru ho totál ne’ebé lei bandu bainhira la kumpre regra ne’ebé lei haruka.
Portavóz ne’e hatutan, tanba osan nu’udar instrumentu ida-ne’ebé dinamiza ekonómia no vida sosiál sidadaun iha país ida, eentaun sidadaun ida-idak iha direitu atu hetan osan liuhosi dalan legál hodi organiza nia moris, uza no halo transferénsia ka halo tranzasaun.
Ho preokupasaun sira-ne’e, RENETIL deklara no apoia tomak ba entidade polisiál no judisiária sira atu hala’o sira-nia kna’ar tuir lei haruka.
“Husu ba parte sira-ne’ebé envolve iha kazu ne’e atu kolabora didi’ak ho autoridade polisiál no judisiária sira,” nia dehan.
Husu ba Prezidente Republika, José Ramos Horta, Primeiru-Ministru, Taur Matan Ruak, membru Parlamentu Nasionál (PN) no partidu polítiku sira atu manifesta apoiu polítiku ba pesoál hosi entidade sira-ne’ebé halo servisu di’ak iha liña frente hodi prevene no kombate krime organizadu.
Nune’e, RENETIL mós rekomenda ba veteranu, sosiedade sivil, igreja, organizasaun de massa, estudante no sidadaun tomak atu apoia no hametin fundamentu Estadu RDTL no kolabora ho dalan pasífiku ba prevene no kombate krime organizadu iha Timor-Leste.
Husu ba Primeiru-Ministru, Taur Matan Ruak, atu avalia no foti medida adekuada ba membru Governu sira-ne’ebé halo interferénsia ba prosesu averiguasaun no investigasaun ba suspeitu hatudu envolvimentu iha tentativa halo transferénsia osan sai hosi aeroportu ne’ebé kontra lei.
Jornalista : Osória Marques
Editór : Cancio Ximenes
