DILI, 13 outubru 2022 (TATOLI)—Diretór Organizasaun Naun Governamentál Timor-Leste (TILOFE), Zaquiel do Carmo, hateten nesesidade atu servisu hamutuk ho Bee Timor-Leste Empreza Públiku (BTL, E.P) atu garante konservasaun bee tanba Rede Koligasaun Agrikultura kontinua luta atu konserva bee iha foho-lolon sira atu nune’e bele asegura reflorestasaun no fonte bee nian.
“Ita tenke hamutuk atu konserva bee iha foho-lolon sira atu bele garante produsaun ai-han iha rai-laran,” nia hateten iha selebrasaun loron ai-han Mundiál, iha Faról, Dili.
Nia dehan, ida-ne’e fó-hanoin katak populasaun kontinua enfrenta problema falta asesu ba sistema bee-moos, hodi hatutan katak rede koligasaun Agrikultura kontinua luta atu rezolve problema ne’e.
Zaquiel do Carmo husu ba BTL kona-ba falta kontrola bee iha kapitál Dili, tanba bainhira uma kain sira iha sidade kontinua atu kuru bee, ida-ne’e bele hamosu dezastre naturál no inundasaun.
Ministériu Obra Públika (MOP) aloka ona ba programa konservasaun bee ba tinan ida-ne’e hamutuk millaun $2.5.
Jornalista : Osória Marques
Editór : Cancio Ximenes
