Governu komprometidu atu prezerva dalen dialeitu Timor-Leste

DILI, 14 outubru 2022 (TATOLI)–Diretor Jerál Arte no Kultura (SEAK), Manuel Ximenes Smith, hateten, SEAK kolabora ho Komisaun Nasionál Timor-Leste hosi organizasaun Nasaun Unida nian ba Edukasaun, sientífiku no kulturál (UNESCO), ho Organizasaun Naun Governamentál no parseiru dezenvolvimentu sira iha esforsu ida atu hamutuk hodi prezerva dalen dialeitu iha Timor-Leste.
“Dalen dialeitu Timor nian balun iha perigu nia laran, hanesan Makua hosi postu administrativu Tutuala, iha Lautém ne’e besik atu lakon, no tanba ne’e ami servisu hamutuk ho Komisaun Nasionál UNESCO ba Timor-Leste atu bele prezerva no proteje dalen dialeitu hirak ne’e,” Manuel Ximenes Smith hateten ba TATOLI, iha Avenida Portugál (anterior; Praia dos Coqueiros), Dili, sesta ne’e.
Diretor Nasionál Patrimóniu Kulturál, Gil Oliveira, haktuir SEAK identifika ona dialetu neen (6) ho ameasa extinsaun mak Makua, Ataua, Adabe, Nanaek, Isni no Lolein.
Tuir Gil Oliveira, Governu sei koopera nafatin ho UNESCO atu kolekta dadus iha Viqueque, Lautém no Baucau hodi identifika dialetu sira seluk ne’ebé iha risku atu lakon no mohu.
Tuir sensu populasaun 2010, iha lian rai-na’in balun ne’ebé eziste hanesan dalen Makua iha ema-ne’ebé hatene ko’alia dalen ne’e hela ema na’in-56 de’it, dalen Atauran ema-ne’ebé bele ko’alia dalen ne’e hela na’in-147, dalen Adabe ho falante na’in 181, Nanaek iha falante na’in 297, no Isni iha falante 703.
Jornalista : Osória Marques
Editór : Cancio Ximenes

