Komunidade ezije Autoridade Bobonaro funsiona postu saúde Tuturema
CAILACO, 13 outubru 2022 (TATOLI)-Komunidade sira ezije Autoridade Munisípiu Bobonaro (AMB), atu entrega xave hodi funsiona postu saúde ne’ebé iha aldeia Tuturema, suku Atudara, postu administrativu Cailaco, munisípiu Bobonaro.
Obra ne’e konstrui tanba hetan apoia fundu hosi povu Japaun liuhosi Japan International Cooperation Agency (JICA) ne’ebé implementa hosi Fundasaun Haburas Moris (FHM) iha tinan 2019, maibe projetu refere finaliza ona to’o agora seidauk hetan inaugurasaun hosi autoridade munisípiu.
Notísia relevante: Rai-rahun falun estrada Cailaco provoka komunidade sofre moras IRA
Xefe aldeia Tuturema, suku Atudara, Carlito Soares, informa, projetu ne’e finaliza ona iha tinan haat ba kotuk maibe to’o agora seidauk hetan inaugurasaun hosi parte kompetente.
Alende iha sentru saúde refere laiha bee mos inklui eletrsidade tanba ne’e husu Governu atu tau iha prioridade nune’e bele fó tratamentu saúde ida-ne’ebé di’ak ba komunidade sira.
“Ami ho xefe suku ezije sira-ne’ebé kaer ne’e mais to’o agora sira seidauk inaugura ne’e, ami sente triste la halimar projetu ne’e hotu tiha ona maibé seidauk uza,” nia imforma ba jornalista sira, iha aldeia Tuturema, sesta ne’e.
Nia agradese ba Governu Japaun no Governu Timor-Leste ne’e harii ona fasilidade saúde iha sira-nia leet tanba durante tinan 20 resin ona komunidade sira susar hetan tratamentu saúde.
“Agora seidauk funsiona, ami la’o-ain ba fali postu saúde Raiheu ho distánsia kilómetru ida, ami sente arraska loos,” xefe aldeia ne’e akresenta.
Administradór postu administrativu Cailaco, munisípiu Bobonaro, Alfredo Meta-Dau, aprezenta ona problema ne’e ba autóridade munisípiu Bobonaro no respota katak iha ona sinál pozitivu atu halo inaugurasaun.
“Iha loron rua ba kotuk ha’u rasik mak levanta kestaun ne’e iha reuniaun konsellu koordenasaun kona-bá postu saúde tolu eziste iha Cailaco hotu tiha ona maibé seidauk inaugura, prezidente autoridade dehan xave ne’e iha ona nia meza leten, iha tempu badak ita sei simu xave hosi munisípiu entrega ba iha saúde atu sentru saúde koloka sira-nia profesionál saúde sira halo sernisu iha ne’e,” nia katak.
Enkuantu totál populasaun iha aldeia Tuturema ne’ebé atu asesu fasilidade saúde ne’e hamutuk na’in-710, kompostu hosi mane 250 no feto 460 ho totál uma-kain 68.
Notísia relevante: Sentru saúde Cailaco rejista IRA 2.273
Jornalista: Sérgio da Cruz
Editòr: Evaristo Soares Martins
