Estudante 1.226 EBF hahú ona avaliasaun kontinuasaun

DILI, 17 outubru 2022 (TATOLI)–Ministériu Edukasaun Juventude no Desportu liuhosi Diretór Servisu Edukasaun Munisípiu Dili, Carlito da Silva, autoriza eskola Ensinu Báziku Filiál (EBF) Fatu-hada hahú ona sira-nia prosesu avaliasaun kontinua ba estudante 1.226, tanba eskola ne’e tama ona iha prosesu konstrusaun.

“Eskola ida EBF Fatu-hada ne’e ha’u maka autoriza sira atu hakat uluk ona prosesu avaliasaun kontinuasaun, tanba agora daudaun eskola ne’e tama ona iha faze konstrusaun edifísiu foun andár rua”, Carlito da Silva hateten ba jornalista sira iha ninia knaar fatin Komoro, segunda ne’e.

Carlito hatutan, orientasaun ne’e atu evita labarik sira hosi impaktu konstrusaun hanesan rai-rahun, bee nalihun iha tempu udan ne’ebé provoka susuk no lumbriga.

Koordenadór EBF Fatu-hada, Zacarias da Conceição, haktuir loloos ne’e sira tenke tuir kalendáriu ezame no avaliasaun kontinua ne’ebé maka termina ona hosi Ministériu Edukasaun maibé tanba eskola ne’e ninia prosesu konstrusaun obrigatoriamente tenke hahú, tan ne’e parte eskola hakerek mós karta ida ba Diresaun Edukasaun Dili atu haree asuntu ne’e.

“Ita-nia karta hetan resposta, diretór SEMD autoriza ita bele hahú ezame avaliasaun tanba tuir planu konstrusaun edifísiu foun andár rua ne’e too dezembru tenke hetan ona 20%”, katak nia.

Tuir nia estudante 1.226 ne’ebé hahú ona avaliasaun kontinua ne’e kompostu hosi estudante primeiru no segundu siklu. Hahú hosi estudante primeiru anu to’o sestu anu. Estudante sira ne’e sei utiliza sala aula neen maka sei uza troka malu iha prosesu avaliasaun kontinuasaun.

Bazeia ba kalendáriu hosi MEJD nian, prosesu ezame nasionál no lokál inklui pasajen klase sei hahú semana ida ne’e, maibé koordenadór ne’e informa sira sei la bele partisipa tanba sira sei la hetan tan espasu no sei prejudika prosesu konstrusaun ne’e rasik. Depois laiha tan eskola seluk maka garante fatin ba sira atu tuir avaliasaun.

Entretantu avaliasaun kontinuasaun ba estudante 1.226 ne’e sei realiza durante semana ida maibé kuandu seidauk remata bele kontinua tanba iha primeiru no segundu siklu ne’e iha de’it maka avaliasaun maibé laiha ezame. Bainhira maka matéria ida hotu maka iha ezame sei realiza kuandu laiha sira kontinua avalia de’it.

Notísia relevante: Konstrusaun EBF Fatu-hada la’ós projetu komunitáriu

Jornalista   : Tomé Amado

Editora       : Rita Almeida