DILI, 17 outubru 2022 (TATOLI)–Koordenadór Eskola Ensinu Báziku Filiál Fatu-hada, Zacarias da Conceição, hateten konstrusaun Ensinu Báziku Filiál (EBF) Fatu-hada la’ós projetu komunitáriu maibé konkursu públiku ne’ebé Ministériu Edukasaun Juventude no Desportu (MEJD) aloka ho verba $727,422.58.
Konstrusaun eskola ho andár rua ne’e, sala aula ualu kompostu hosi kada andár ho sala aula haat ne’e realiza hosi kompañia Betuhei unipesoal, Lda ho númeru konstrusaun NCB-NÚ: 002/MEJD/DNA/2022.
Ministériu nian planu ba tinan ida ne’e hadi’a kondisaun eskola hamutuk 203 iha territóriu nasionál atu apoiu estudante sira iha prosesu ensinu aprendizajen ida adekuadu.
“Konstrusaun ba ita-nia eskola EBF Fatu-hada ne’e sei realiza ba bloku rua. Hahú uluk bloku primeiru depois maka kontinua filafali bloku segundu, entaun hosi bloku rua ne’e tuir planu to’o dezembru, bloku rua ne’e tenke atinje hotu ona 20%”, Zacarias da Conceição hato’o asuntu ne’e ba jornalista sira iha eskola EBF Fatu-hada, segunda ne’e.
Zacarias informa, daudaun ne’e edifísiu eskola antigu EBF nian hosi parte leten sobu hotu ona falta de’it parte klaran no parte kraik. Ne’ebé hein konstrusaun andár ida ninia sinta rai sa’e hotu ona maka sei sobu fali edifísiu parte kraik nian, ne’ebé parte eskola sei buka maneira atu labarik sira bele hetan nafatin direitu depois termina avaliasaun kontinuasaun ne’e
“Ita sei halo nafatin esforsu atu estudante sira depois remata avaliasaun kontinuasaun ne’e, sira bele hetan nafatin espasu ruma iha eskola ne’e hodi bele partisipa nafatin prosesu ensinu aprendizajen”, tenik nia.
Konstrusaun ba eskola EBF ne’e rasik hahú 12 outubru 2022 ba tinan ida de’it. Tanba ne’e maka kompañia rasik ezije ba ministériu no parte eskola atu aselera prosesu ne’e atu kompañia bele hala’o ninia servisu.
Notísia relevante: Estudante 1.226 EBF hahú ona avaliasaun kontinuasaun
Jornalista : Tomé Amado
Editora : Rita Almeida
