Top

WFP apoiu ai-han pakote ba inan isin-rua iha munisípiu neen

Inan Feton isin rua sira bainhira ba iha Centru klinika Formosa hodi Cek up ba sira nia bebe, Tersa 5 Otubru 2021.Imaje Tatoli/Antonio Goncalves

DILI, 18 outubru 2022 (TATOLI)—Diretór Jerál Ministériu Solidariedade Sosiál no Inkkuzaun (MSSI), Florencio Pina hateten, tersa ne’e, Programa Ai-han Mundiál (WFP, sigla inglés) apoiu ai-han pakote ba inan isin-rua no inan fó susu bebé iha munisípiu neen (6) mak Baucau, Covalima, Ermera, Dili, Manatuto, no Manufahi.

Diretór hateten kestaun ne’e iha armazén Bebora, bainhira WFP apoiu ai-han pakote hanesan foos tonelada 1.594, koto tonelada 213 no mina ho tonelada 106 ba fulan tolu nian, ne’ebé tuir planu hahú aban distribui ona ba munisípiu sira.

“Objetivu hosi projetu ne’e atu redús risku negativu impaktu nutrisaun ba inan isin-rua no inan fó susu bebé ne’ebé mak ita identifika sai hanesan área no númeru aas liu ba grupu vulneravél nutrisaun nian,” Florencio Pina hateten ba Agência Tatoli, Dili, tersa ne’e.

Diretór Adjuntu WFP, Ash Roger, hateten katak WFP kontinua fó asisténsia ai-han ba inan isin-rua sira no inan sira ne’ebé fó-susu bebé sira nu’udar estratéjia bele fó impaktu diretu ba nutrisaun ba grupu vulneravél sira.

“Asisténsia ai-han bele konsidera nu’udar estratéjia ida-ne’ebé efetivu liu iha tempu badak hodi hamenus impaktu negativu ba nutrisaun ba grupu vulneravél sira,” Diretór Adjuntu WFP ne’e hatete iha nia diskursu.

Nia hatutan, asisténsia ai-han ne’e iha kooperasaun entre PAM no Governu Timor-Leste, hodi hatutan apoiu husi Governu Japaun.

Adjunta Xefe Misaun Embaixada Japaun iha Timor-Leste, Kazumi Yamada, hateten povu Japaun oferese ona miliaun $3 hodi apoiu projetu ida-ne’e.

Japaun kontinua iha kompromisu hodi hametin liután relasaun amigável ne’ebé mak iha ona entre país rua ne’e, no servisu hamutuk ho povu Timor-Leste hodi atinje meta dezenvolvimentu país ida-ne’e nian.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!