AELJ abertura kursu lian Japaun ba joven 50 iha Tunubibi
BOBONARO, 19 outubru 2022 (TATOLI) – Asosiasaun Eskolár língua Japaun (AELJ), Mirai-Sat, tersa ne’e halo abertura ba kursu lian japonés ba joven na’in-50 iha aldeia Tunubibi, suku Tapo-Memo, postu administrativu Maliana, munisípiu Bobonaro.
Fundadór AELJ Mirai-Sait, Julião Nunes José, esplika, objetivu hosi estabelesimentu kursu ne’e atu fó koñesimentu ba lian japonés ba joven sira iha munisípiu Bobonaro, liuliu iha aldeia Tunubibi.
Notísia relevante: Governu Japaun kontinua apoia Timor-Leste iha setór edukasaun
“Kursu ida-ne’e hetan rekoñesimentu hosi Governu Japaun, ho komunidade japneza iha Timor-Leste, sira mós hatene katak ami-nia asosiasau ne’e fornese duni edukasaun ba lian japónes,” nia ko’alia iha Tunubibi, Maliana.
Julião akresenta, kursu ne’e sei fó oportunidade ba partisipante na’in-50, maibé ba oin sei haree númeru estudante aumenta sei serbisu hamutuk ho autoridade lokál sira hodi haluan tán espasu atubele simu kualkér joven ne’ebé hakarak aprende lian japoneza.
Fundadór ne’e reforsa, kursu ne’e rasik hala’o depende ba partisipante sira-nia tempu mamuk, ne’ebé sei akompaña hosi formadór lokál sira atu nune’e bele fasilita partisipante sira adapta halo interasaun no komunikasaun di’ak oinsá mak durante fulan tolu nia laran bele koñese letra no lee.
“Iha meiu oinoin ne’ebé governu japaun oferese ba timoroan sira. Sé sira estudante karik no iha kautak di’ak karik, sira bele koko bolsa estudu ka formasaun no bele mós governu nia programa daudaun ko’alia ne’ebé atu manda joven sira ba Japaun, entaun sira bele uza oportunidade partisipa iha kompetisaun ne’e,” nia fó hanoin.
Reprezentante prezidente autoridade munisípiu Bobonaro, António Soares, agradese ba aosiasaun língua japoneza tanba bele fó ona oportunidade ba joven sira aprende atubele hasa’e sira-nia abilidade.
“Ha’u husu ba joven sira, atu aprende didi’ak, tanba ne’e oportunidade di’ak ba timoroan sira atu ba serbisu iha japaun,” nia akresenta.
Diretór Sekretariadu Formasaun Profisionál no Empregu, Munisípiu Bobonaro, Calisto Mau-Ati, husu joven sira atu uza opurtunidade aprende tanba bele hadi’ak moris iha futuru.
“Ha’u husu ba joven sira durante formasaun nia laran, aproveita didi’ak matéria saida mak treinadór sira fó, tanba sira fó ona opsaun ba imi-nia koris. Sé ita-boot sira la aproveita, signifika ita-boot sira la hetan oportunidade,” nia hateten.
Notísia relevante: Governu Japaun reabilita koléjiu Dom Bosco Fatumaca
Jornalista : Sérgio da Cruz
Editór : Evaristo Soares Martins
