Top

SEJD hein proposta FFTL no LFTL apoia fundu realiza liga futeból Timorense

Sekretáriu Estadu Juventude no Desportu, Abrão Saldanha. Imajen Tatoli/Francisco Sony

DILI, 20 outubru 2022 (TATOLI)— Sekretáriu Estadu Juventude no Desportu (SEJD), Abrão Saldanha, informa Governu iha osan atu apoia ba órgaun Liga Futeból Timor-Leste (LFTL) hodi realiza liga Timorense époka 2022-2023.

“Governu iha osan atu tau ba orgaun liga, maibé hela fulan rua de’it ona ezekusaun orsamentu ramata, nune’e ami husu ona ba Federasaun Futeból Timor – Leste (FFTL) no Liga Futeból Timor-Leste (LFTL) atu hato’o fali proposta mai atu ita bele aloka osan ba hodi realiza liga époka 2022-2023”, hateten SEJD Abrão ba Agência TATOLI iha salaun Komisaun Nasionál Eleisaun (CNE-sigla portugés)-Caicoli, kinta ne’e.

Notísia relevante: SEJD mantein aloka rihun $200 hodi realiza liga futeból Timorense

Hafoin, Prezidente LFTL, Nilton Gusmão rejigna-aan hosi kargu no LFTL hili nia Vise Primeiru ba lidera provizóriu no buat hotu la’o loos ona.

“Ha’u rona foin lalais parte LFTL no FFTL halo ona enkontru kona-bá liga ne’e no sira haruka proposta mai ami bele haruka ona osan ba sira realiza liga”, katak.

Maski nune’e, Governu liuhosi SEJD kontinua apoia osan hamutuk $200.000 tuir deklarasaun ne’ebé antes ne’e fó sai ona.

SEJD aloka orsamentu $200,000, hosi FFTL $200,000 no LFTL mós iha fundu purvolta rihun $140, maibé la sufisente nafatin hodi realiza Liga époka ne’e.

Orsamentu la sufisente, tanba klube iha primeira divizaun hakarak hasa’e subsídiu liga timorense hosi $20.000 ba $40.000 no segundu divizaun hakarak subsídiu antes ne’e $10.000 hasa’e ba $20.000.

Nune’e, tuir kalku presiza tan orsamentu ho montante purvolta $500.000 atubele kompleta to’o $100.000-resin hodi finansia nesesidade tomak liga nian.

Maibé, Governu nafatin husu ba órgaun liga atu esforsu oinsá bele buka osan uitoan atu aumenta nune’e liga bele la’o.

Maske tempu limitadu ona, maibé Governante ne’e fiar liga sei bele la’o iha tinan ne’e, bainhira iha vontade di’ak entre LFTL no FFTL.

Notísia relevante:FFTL no LFTL enfrenta problema finanseiru realiza liga futeból époka 2022-2023

Jornalista: Hortencio Sanchez

Editór     : Florencio Miranda Ximenes

Publisidade

Leave a Reply

Latest Post

error: Content is protected !!