DILI, 21 outubru 2022 (TATOLI)—Diretór Interinu Asosiasaun Halibur Defisiénsia Matan Timor-Leste (AHDMTL), Gabriel Ponciano de Sousa, hateten administradór munisípiu Manufahi ho nia estrutura oferese ona rai ba AHDMTL hodi harii sentru formasaun ba letra braille nian hodi ema ho defisiénsia sira bele apreende.
Notísia Relevante: Preaparasaun eleisaun parlamentár: AHDMTL fó formasaun letra braille ba EhD matan
“Administradór Manufahi ho nia estrutura oferese ona rai ba ami tanba sira hanoin bainhira ami fó formasaun ba ema ho defisiénsia matan hamutuk 30 ne’ebé akumula hosi Manufahi, Covalima no Ainaro, maibé formasaun ne’e hala’o iha Manufahi tanba trasporte no fatin mak laiha, nune’e ita deside iha rejiaun III iha Manufahi nian,” Diretór ne’e hateten ba Agência Tatoli, iha nia kna’ar fatin, Manleu, sesta ne’e.
Rai ne’ebé administradór Manufahi oferese. Tuir nia, sei seidauk hatene nia medida hira mak atu fó ba AHDMTL.
“Ita seidauk hatene rai nia medida hira, tanba parte terras propriedade seidauk ba sukat maibé tuir ami-nia estimasaun ne’e rai ne’ebé mak oferese ne’e ho nia medida 30 x 80,” nia dehan.
Planu atu harii sentru iha tinan ne’e maibé sei haree fali ba fundu hodi harii sentru formasaun, maibé se orsamentu seidauk to’o mak AHDMTL tenta hakbesik ba parseiru no ajénsia internasionál sira hodi bele apoiu.
“Ita sei buka parseiru no ajénsia dezenvolvimentu hodi bele ajuda fundu ba ita bele harii sentru ne’e, hodi fasilita no hasa’e mós ita-nia maluk ema ho defisiénsia nia kuiñesimentu kona-ba letra briaille ne’e,” nia dehan.
Tanba, durante ne’e AHDMTL fó ona formasaun ba ema ho defisiénsia nakonu matan ne’e ho dezafiu sira no iha mós benefisia ba ema ho defisiénsia sira.
“Bainhira ita fó formasuan bai ta-ia maluk EhD iha dezafiu oioin de’it mak kestaun tempu tanba semana rua, entaun sira labele apreende ho di’ak. Seluk mak finansimentu menus tebes, fatin ba formasaun laiha no ita aluga uma komunidade nian de’it,” nia hateten.
Tanba liuhosi formasaun letra braille ne’e bele kapasita ema ho defsiénsia sira-nia kuiñesimentu hodi bele sai hanesan bukae ba sira iha futuru liu-liu kompete iha edukasaun tanba edukasaun mak save importante.
Jornalista : Osória Maraues
Editór : Cancio Ximenes
