BOBONARU, 24 outubru 2022 (TATOLI)-Estudante Sentru Aprendizajen no Formasaun Eskolár (CAFE, sigla portugés) Maliana, munisípiu Bobonaro, hosi ensinu báziku terseiru siklu no ensinu sekundariu hamutuk 121, segunda ne’e tuir ezame nasionál tinan letivu 2022.
Diretóra CAFE Maliana,Teresa Moreira, hateten finalista hirak ne’e sei tuir ezame ho di’ak. Tanba durante ne’e, estudante sira tenke iha apoiu espesífiku kona-ba materiá iha ezame nasionál. Ezemplu, sira sei iha duvida ruma bele rezolve ho profesór sira iha aula.
Notísia Relevante: Estudante 4.332 iha Bobonaro sei partisipa ezame nasionál
“Terseiru períodu nian, ami iha apoiu online ho kolega CAFE sira seluk ne’ebé mak ajuda ami, liu-liu hanesan matéria klínika, fízika, depois iha mos kolega sira hosi CAFE sira seluk mai iha ne’e, atu ajuda alunu sira esplika matéria sira”, katak Moreira.
Estudante Selviana Alexandria Lay, hateten la duvida ho prova sira iha ezame nasionál, tanba durante ne’e ativu partisipa aula. “Antes ezame ha’u sente tauk, maibé sentimentu tauk ne’e lakon tanba durante ne’e ami prepara ho di’ak, no profesora sira mós suporta tebes ami, sira fó matéria kompletu ho sira-nia esplikasaun mós kompletu, e sira sempre dehan liafuan motivasaun mai ami, entaun halo ami preparadu liu tan”.
Tuir observasaun Tatoli prosesu ezame la’o tuir regra ne’ebé Ministériu Edukasaun Juventude no Desportu (MEJD) fó sai ona, tanba hetan supervizaun hosi funsionariu servisu edukasaun munisípiu Bobonaru hahú to’o termina.
Tuir dadus hosi diresaun servisu edukasaun munisípiu Bobonaru totál estudante finalista hamutuk 4.322 mak partisipa ezame nasionál. Hosi sentru ensinu báziku hamutuk 30 ho nia alunu hamutuk 2.578, ensinu sekundáriu jerál iha sentru realizadora ezame nasionál hitu no totál alunu 1.261, no eskola tekniku vokasionál ualu ho totál alunu 493.
Notísia Relevante:Komandante PNTL sujere parte seguransa akompaña distribuisaun matéria ezame nasionál Viqueque
Jornalista : Sérgio da Cruz
Editora : Rita Almeida
