MS halo apreesaun ba ai-moruk xarope kontaminadu “termorex no Unibebi cough”
MS DILI,26 outubru 2022 (TATOLI)— Ministériu Saúde liuhosi Ekipa konjuntu Saúde, kuarta ne’e, halo inspensaun urjente hodi halo apreensaun ba ai-moruk xarope kontaminadu termorex no unibebi cough iha territóriu nasionál.
Ekipa konjunta halo apreensaun ne’e ho baze ba despaisu hosi Ministra Saúde, ne’ebé fó orden ba Diretora Prestasaun Saúde, Odete Veigas, hodi forma ekipa hodi halo inspesaun urjenta ba armazein empreza importadór medikamentu sira.
Notísia relevante:MS alerta labarik sira labele konsumu ai-moruk “Termorex Syrup no Unibebi Cough Syrup”
“Ohin, ita konsegue tun halo inspesaun urjente ba importadór privadu hanesan Instana Farmasia I, Instana Farmasia II, no Bem Povu ne’ebé mak ita konsege hetan halo apreensaun medikamentu termorex syrup botir 78 no unibebi cough syrup botir 2.299”, Diretór Nasionál Farmásia no Medikamentu (DNFM), Delfim Ferreira informa ba jornalista sira bainhira ramata inspesaun iha Armazein SAMES-Kampu Alór, kuarta ne’e.
Ai-moruk hirak ne’e lori mai asegura iha armazin Servisu Autónomu Medikamentu no Ekipamentu Saúde (SAMES), molok lori bá destroi tuir protokolu ne’ebé mak iha.
“Ohin, ita halo ona inspesaun no ba oin kontinua halo nafatin ba importadór sira ne’ebé mak rejista iha sistema, liuliu Farmasia iha Dili laran, hafoin kontinua ba iha munisípiu sira”, katak.
MS husu ba importadór sira tenke kolabora ho Ministériu Saúde karik iha estoke ai-moruk rua ne’ebé mak Indonézia bandu bele rekolla, nune’e komunidade sira labele konsumu.
“Maibé se importadór ne’ebé mak ita ba ona rekolla mak sira kontinua faan Ministériu Saúde sei fó sansaun bazea ba lei númeru 12/2004 hodi selu multa. Nune’e ami husu ba importador sira karik aimoruk rua ne’e iha ita kolabora hodi rekolla atu nune’e bele garante populasaun nia saúde”. katak
Atividade inspesaun ida ne’e sei halo iha territóriu laran tomak liuliu ba farmasia privadu sira hahú 26 outubru to’o 12 novembru 2022.
Daudaun importadór ne’ebé mak rejistu iha Sistema Farmásia Medikamentu Ministériu Saúde hamutuk 18, maibé ualu mak ativu no seluk husu lisensa maibé la halo atividade.
Notísia relevante:MS: ai-moruk xarope kontaminadu seidauk tama Timor-Leste
Jornalista : Felicidade Ximenes
Editór : Florencio Miranda Ximenes
