Top

MS alerta labarik sira labele konsumu ai-moruk “Termorex Syrup no Unibebi Cough Syrup”

MS identifika Xarope Kontaminadu tipu rua hanesan “Termorex Syrup no Unibebi Cough Syrup”. Imajen/Espesiál

DILI, 25 outubru 2022 (TATOLI)— Ministériu Saúde (MS) liuhosi Diresaun Nasionál Farmásia no Medikamentu (DNFM), alerta ba públiku liuliu labarik sira atu labele konsumu ai-moruk “Termorex Syrup no Unibebi Cough Syrup” tanba kontaminadu ona no bele fó perigu ba labarik sira nia saúde.

Alerta ne’e, MS halo ho baze informasaun hosi Balai Pengawasan Obat dan Makanan (BPOM) Indonézia ne’ebé halo teste ba ai-moruk xarope ba labarik ho totál 39 fornada/batch hosi tipu 26. Hosi rezultadu teste refere indika katak item lima mak kontaminadu ho Etilen Glikol (EG) no Dietilen Glikol (DEG). Substánsia rua ne’e perigozu no bandu atu kahur ba ai-moruk xarope sira ne’ebe uza ba labarik.

BPOM Indonézia hala’o teste no fó rezultadu katak ai-moruk tipu lima mak labele halo sirkulasaun iha merkadu tanba perigu ba labarik sira, hanesan tipu Termorex Syrup (ai-moruk isin manas), Florin DMP Syrup (aimoruk mear no gripe), Unibebi Cough Syrup (ai-moruk mear no gripe), Unibebi Demam Syrup (ai-moruk isin manas) no Unibebi Demam Drops (ai-moruk isin manas).

Hosi medikamentu lima, Ministériu Saúde identifika ona tipu rua iha ona Timor-Leste mak hanesan Termorex Syrup (ai-moruk isin manas), ne’ebé produs hosi PT Konimex ho númeru lisensa distribuisaun DBL7813003537A1 no Unibebi Cough Syrup (ai-moruk mear no gripe), produs hosi Universal Pharmaceutical Industries ho númeru lisensa distribuisaun DTL7226303037A1.

Tipu médikamentu rua refere importa hosi importadór lokál ida ne’ebé rejistu iha Ministériu Saúde no importa hosi nasaun viziñu Indonézia.

Diretór Nasionál Farmasia
no Medikamentu- MS, Delfim da Costa Xavier Ferreira. Imajen Tatoli/Francisco Sony

“Ita halo identifikasaun xarope kontaminadu tipu rua mak empreza lokál ho inisiál IST Importa ona mai Timor-Leste. liuhosi lista ai-moruk ne’ebé rejistu iha Diresaun Nasionál Farmásia no Medikamentu no ita husu ona atu hapara distribuisaun no faan hodi labarik sira labele konsumu”, hateten Diretór Nasionál Farmásia no Medikamentu Ministériu Saúde, Delfim Ferreira  ba Agência TATOLI, tersa ne’e.

Nune’e, Departamentu Autorizasaun Introdusaun no Merkadu halo komunikasaun verbál ba kompaña refere no ba importadór seluk, inklui mós Farmásia Retallu sira atu rekolla no hapara distribuisaun ka fa’an ai-moruk refere ba komunidade sira.

“Ita tuun direitamente ba importadór refere hodi identifika ai-moruk rua ne’ebé mensiona iha leten no halo xamada inklui husu atu rekolla no labele fa’an ka distribui sai tan ai-moruk ne’e”.

MS mós husu ba fasilidade saúde públiku no setór privadu sira atu koopera hodi labele distribui tipu ai-moruk ne’e. Husu mós ba pesoál saúde sira (médiku) liliu iha klínika privadu ne’ebe halo tratamentu klínika atu labele preskreve ai-moruk ne’ebé mensiona ihaba pasiente.

MS  hakarak apela ba públiku atu labele sosa fó ai-moruk “termorex syrup no Unibebi Syrup ba labarik sira. Tanba ai-moruk hirak ne’e kontaminada ho substansia Etilen Glikol (EG) no Dietilen Glikol (DEG) no daudaun ai-moruk rua ne’e sirkula hela iha territóriu laran tomak hanesan farmásia retallu, apotik ho kioske.

“Ho informasaun ida ne’e,  lá’os atu halo ta’uk ka halo pániku populasaun sira, maibé husu atu nafatin alerta bainhira sosa ai-moruk iha farmásia, loja ai-moruk no mós kioske sira ne’ebé fa’an ai-moruk refere”.

Hosi deklarasaun BPOM ne’ebé fó sai seidauk iha prova ikus mak hatete utilizasaun ai-moruk xarope ne’e iha relasaun ho pasiente ne’ebe faille renal tanba atraves utilizasaun ai-moruk sei iha fatór seluk ne’ebé fó kauza ba falla renal krónika, hanesan infesaun virus, batéria leptospira, no multisystem inflammatory syndrome in children (MIS-C) ou síndrome inflamatória multissistêmica pós-covid-19.

Nune’e, Ministériu Saúde nafatin uza meiu hotu ne’ebé iha hodi asegura mo kontrola ai-moruk sira ne’ebé tama no sirkula iha Timor Leste.

Jornalista :Felicidade Ximenes

Editór      : Florencio Miranda Ximenes

Publisidade

Leave a Reply

Latest Post

error: Content is protected !!