DILI, 28 outubru 2022 (TATOLI)—Sekretária Estadu Igualdade no Inkkuzaun (SEII), Maria do Rosário Fátima Coreia, hateten SEII sei identifika no enkoraja portadora defisiénsia hodi kompete ba eleisaun xefe suku iha tinan oin.
“Ami hakarak enkoraja portadora defisiénsia atu kompete ba eleisaun xefe suku 2023, mezmu defisiénsia maibé sira iha kapasidade intelektuál. Agora ne’e ami halo identifikasaun, karik sira hakarak ita fó formasaun ba sira, nune’e bele kompete,” Maria do Rosário Fátima Coreia hateten ba Agência Tatoli, sesta ne’e.
SEII hanoin hela atu fó mós oportunidade ba maluk portadora defisiénsia sira, dala barak liu Organizasaun Naun Governamentál (ONG) konsidera maibé SEII haree katak komesa iha espasu bainhira VIII Governu Konstituisionál mai ho nia polítika asuntu igualdade inkluzaun hodi konsidera ema ho defisiénsia iha fatin públiku.
Ezemplu Ministériu Obra Públiku (MOP) ho Xefe Estadu, José Ramos Horta, mós konsidera no iha maluk defisiénsia na’in-rua ne’ebé servisu iha sira-nia gabinete hanesan asesór ba asuntu Ema ho Defisiénsia (EhD).
“Nune’e, SEII husu ministériu fó mós espasu ba ministériu sira seluk atu envolve no konsidera mós maluk portadora defisiénsia sira. Maibé importante mak tenke prepara uluk lai rampa, nune’e sira bele uza hodi halo servisu loro-loron nian,” nia dehan.
Jornalista : Osoria Marques
Editór : Cancio Ximenes
