iklan

EKONOMIA, HEADLINE, MUNISÍPIU, OÉ-CUSSE (RAEOA)

Autoridade RAEOA hatuur fatuk dahuluk ba projetu ponte Noetoko 

Autoridade RAEOA hatuur fatuk dahuluk ba projetu ponte Noetoko 

Autoridade RAEOA lansa ponte Noetoko benefísia komunidade sub-rejiaun tolu. Imajen Tatoli/ Abílio Elo Nini.

OÉ-CUSSE, 04 novembru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) lideradu Arsénio Paixão Bano, sesta ne’e hatuur fatuk dahuluk ba ponte Noetoko hodi fasilita komunidade sira mai hosi sub-rejiaun Nítibe, Oésilo no Pássabe.

Ponte Noetoko lokaliza iha aldeia Kuanobe, suku Ban-Afi, sub-rejiaun Nítibe, ho distánsia metru 120 kompleta ho gabiaun protesaun ho distánsia metru 160, alende ne’e mós sei halo ponte ki’ik rua seluk iha aldeia Neofmetan, suku Ban-Afi hodi liga ba suku Lela-Ufe.

Iha diskursu lansamentu ne’e, Prezidente Autoridade RAEOA, Arsénio Paixão Bano, informa, kontrusaun ponte Noetoko iha futuru sei rezolve preokupasaun komunidade hosi sub-rejiaun tolu maihosi sub-rejiaun Nítibe rasik, sub-rejiaun Oésilo no Pássabe atu transporta produtu ba merkadu iha tempu udan.

“Ponte Noetoko ho ponte ki’ik rua seluk importante tebes, nia futuru sei tulun inan-aman sira iha suku lima hosi sub-rejiaun Nitibé tomak atu asesu ba sub-rejiaun Oésilo liga mós ho ponte Bitopa, la’ós ida-ne’e de’it tulun mós inan-aman sira mai hosi sub-rejiaun Passabe, RAEOA tenke la’o ba oin lalika hein tán ita tenke aproveita didi’ak tempu atu halo buat ba ita-nia rai enklave ne’e,” Arsénio Paixão Bano, ko’alia iha serimónia hatuur fatuk dahuluk.

Autoridade ne’e kompromete, iha futuru sei loke dezenvolvimentu kobre ba área rurál sira iha territóriu Oé-Cusse, nune’e movimentu komunidade asesu ba merkadu ho dignu tantu tempu udan no bailoron.

“Tán ne’e maka iha tinan 2022 ne’e, autoridade hahú halo manutensaun no melloramentu ba estrada rurál sira, ida-ne’e nia intensaun ne’e atu fasilita komunidade sira, tanba durante ne’e iha sub-rejiaun tolu susar tebes atu asesu ba merkadu sira iha vila, liuliu iha tempu udan,” nia afirma.

Diretór Rejionál Infraestrutura, Candido dos Reis Amarál, hatete, diresaun infraestrutura liuhosi departamentu servisu ponte no estrada hodi hili ponte ne’ebé ho presu efisiénsia liu, nune’e bele halo iha fatin sira-ne’ebé geografikamente fasil atu instala atu asesu iha tempu udan.

“Razaun sira-ne’e maka ami deside hili ponte ida ho modelu multi-plate, tan ne’e foin daudaun ami verifika ona ekipamentu sira iha Indonézia preparadu no garante kualidade ba materiál ne’ebé maka ita sei uza ba instalasaun ponte Noetoko ne’e, nomoos halo ponte ki’ik rua importante tebes iha aldeia Neofmetan liga ba suku Lela-Ufe,” nia katak.

Jestór sub-rejiaun Nítibe, Teodoro Sila, orgullu no agradese ba Autoridade RAEOA tanba ponte Noetoko liga ho ponte Bitopa mak sai alternativa atu liga komunidade sira mai hosi sub-rejiaun tolu atu asesu ba sub-rejiaun Pante Makasar.

Nia enkoraja xefe suku lima iha pertense Nítibe hanesan uma-na’in ba konstrusaun ne’e atu koopera ho empreza nune’e bele finaliza obra ne’e ho kualidade.

“Hanesan jestór Nítibe sei enkoraja komunidade ho estrutura sira lima atu koopera serbisu hamutuk ho empreza tanba konstrusaun ne’e primeira-vez mai atu rezolve ami iha área rurál, entaun ida-ne’e orgullu boot mai ami, tán ne’e ami promete durante obra ne’e la’o sei la’o ho susesu to’o konklui,” nia promete.

Entretantu projetu ponte Noetoko inklui ponte ki’ik rua iha aldeia Neofmetan, suku Ban-Afi, ezekuta hosi empreza Lifau Indah Unipesoal Lda ho valór kontratu $625,451.54, ne’ebé Autoridade RAEOA prevee hosi Orsamentu Jerál Estadu (OJE) 2022 ho durasaun serbisu durante fulan neen.

 Notísia relevante: Autoridade lokál nia esperansa ba futuru konstrusaun ponte Bitopa-Noetoko

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!