Top

Tribunál adia desizaun ba kazu eis-ministru António “Kalohan”

Arguidu António da Conceição “Kalohan”, marka prezensa iha TDD, kinta (08/04/2021). Imajen Tatoli/Nelson de Sousa.

DILI,04 novembru 2022 (TATOLI)- Tribunál Distritál Dili (TDD), sesta (04/22) ne’e, deside halo adiamentu ba  leitura  akordaun  ba  kazu eis-Ministru Turizmu, Komérsiu no Indústria (MTCI), António Conceição ‘Kalohan’ inklui arguidu nain haat seluk, ne’ebé deskonfia envolve kazu krime falsifikasaun dokumentu publiku hodi fó prejuizu ba Estadu.

Razaun Juis ba prosesu Ivan Suritai deside adia hikas desizaun finál ne’e ba loron 2 dezembru  2022, tuku 16:00, lokoraik,   tanba  volume  serbisu  ne’ebé maka barak hafoin fila hosi Portugal, nune’e seidauk termina  elaborasaun akordaun ba kazu ne’e.

Notísia relevante: MP alega eis-ministru António Kalohan ho pena prizaun tinan lima

“Ha’u seidauk bele konklui prosesu leitura akordaun ba kazu ne’e, tanba hafoin ha’u fila hosi Portugál no fila mai ha’u okupadu ho serbisu barak, liuliu kaer prosesu barak, tanba ne’e ha’u husu tan loron tolu nulu hodi bele konklui hotu akordaun ba kazu ne’e,” Juiz ba prosesu Ivan Suritai deklara iha sala julgamentu TDD, Sesta ne’e.

Juis prosesu ne’e afirma Juiza koletivu Maria Solana  ne’ebé kaer kazu António Conceição atuál Deputadu Parlamentar hosi Bankada PD mós tuir hela formasaun iha Portugal,   tanba ne’e  difisil tebes atu halo kontaktu hodi fó ninian opiniaun ba iha akordaun ne’e.

Tanba ne’e, nia dehan hanesan Juis ne’ebé kaer kazu ne’e, husu atu atu fó tan tempu hodi konklui prosesu elaborasaun akordaun.

Maske la konsege halo leitura akordaun, maibé  Juis ba posesesu Ivan Suritai, halo de’it alterasaun juridika ba krime falsifikasaun dokumentu ba fali krime falsifikasaun dokumentu públiku, tuir pedidu husi Ministériu Públiku nian ne’ebé  antes ne’e imputa ba arguidu na’in-tolu, hanesan arguida Julmira, arguidu  Gaspar no Paulo.

Nune’e mós, Juis ba prosesu ne’e, indefere pedidu hosi MP nian ne’ebé antes ne’e husu ba tribunál atu altera fali valór prejuizu ne’ebé hamosu hosi arguidu  sira ho montante $143.500  fali valór $191.000.

Notísia relevante :Defeza husu TDD absolve kazu eis-ministru António da Conceição 

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!