iklan

EKONOMIA, BOBONARO, HEADLINE, MUNISÍPIU

AMB husu abitante Ana-Hun iha Odomau hapara fera fatuk iha foho Pintu Gerbang

AMB husu abitante Ana-Hun iha Odomau hapara fera fatuk iha foho Pintu Gerbang

Abitante aldeia Ana-Hun, suku Odomau, postu administrativu Maliana, munisípiu Bobonaro, Victor Sanchez, fera ka baku hela fatuk Iha foho pintu gerbang nia lolon. Imajen Tatoli/Sérgio da Cruz.

BOBONARO, 07 novembru 2022 (TATOLI) – Prezidente Autoridade Munisípiu Bobonaro (AMB), Ernesto de Oliveira Barreto, husu abitante iha aldeia Ana-Hun, suku Odomau, postu administrativu Maliana, munisípiu Bobonaro, atu hapara atividade fera fatuk iha foho pintu gerbang nia lolon tanba iha foho nia hún ema no transporte movimenta ba mai.

Autoridade munisípiu ne’e hateten, foho pintu gerbang ne’e nia hún hanesan dalan alternativu ne’ebé liga hosi kapitál Maliana ba postu administrativu Bobonaro no Lolotoe to’o munisípiu Covalima.

Tanba ne’e bainhira komunidade sira kontinua sobu fatuk orijinál sira-ne’ebé kalsu malu metin ho rai konserteza fatuk boot sira iha leten bele monu tún hotu mai taka metin estrada laran inklui bele fó ameasa ba ema-nia vida.

Notísia relevante: Xefe suku Odomau ezije governu aselera projetu estrada urbana Maliana

“Ha’u hakarak fó mensajen ba populasaun sira-ne’ebé hela iha foho hanesan ha’u-nia populasaun iha suku Odomau, ke’e sai fatuk iha foho lolon loloos ne’e labele, tanba saida, dalaruma movimentu karreta, motorizada liu ba fatuk derrepente monu, ema iha karreta laran ne’e bele mate hotu, entaun ema ne’e la’ós Maromak mak fó nia destinu, maibé ita ida sobu fatuk ne’e maka hakotu ema-nia vida,” nia ko’alia iha Maliana, segunda ne’e.

Bainhira komunidade kontinua halo atividade ne’e, autoridade munisípiu sei koordena ho parte relevante sira hanesan; diresaun meiu ambiente, administradór postu no xefe suku, atu tún ba terrenu hodi hapara obrigatóriu tanba iha tempu udan fatuk sira-ne’e mamar hotu ona.

“Sé ita ke’e iha kraik ne’e bele fó risku ba estrada ne’ebé maka governasaun agora halo hela, sé ita ke’e iha leten mós hanesan fó risku ba pasajeiru sira, entaun ita tenke kontribui, ne’ebé ha’u husu para ona, sé bele buka fatuk iha fatin seluk ne’ebé maka labele fó risku ba ema-nia vida,” Ernesto sujere.

Abitante aldea Ana-Hun,Victór Sanches, rekoñese atividade ne’ebé sira halo bele fó ameasa ba sira-nia vida no ema seluk, maibé tanba nesesidade, obrigatóriu tenke halo duni serbisu todan ne’e.

“Ami serbisu laiha, ne’e maka ami halo ida-ne’e, ami halo ida-ne’e atu sustensa ami-nia oan nia moris no ami-nia moris loron-loron, tanba ami-nia oan sira eskola mós presiza osan, ne’e mak ami halo ida-ne’e. Sé kuandu governu fó ona serbisu maka ami labele ke’e ona fatuk ka baku fatuk iha-ne’e,” abitante ne’e hateten iha foho Pintu Gerbang.

Nia haktuir, atividade baku fatuk la’ós foin mak hahú, maibé dezde okupasaun Indonézia nian tanba iha altura ne’ebá kompañia lokál Suli-Mea mak interese atu sosa hodi konstrui Kapela Ana-hun, inklui fa’an ba komunidade sira seluk.

Tuir nia, jerasaun antigu sira-ne’ebé uluk inísia fera-fatuk ne’e agora mate hotu ona, ne’e duni serbisu todan ne’e sai atividade ne’ebé husik hela ba jerasaun kontinuadór sira tanba kestaun nesesidade ka ekonomia família nian.

“Ami serbisu iha-ne’e mos ta’uk, maibé dezaraska tenke halo duni, atu dehan de’it iha parte ida sa’e mai ne’e sobu fatuk, hosi Indonezía nia tempu to’o mai ate agora risku sei laiha, kona-bá atu hanehan ema mate no rai-halai ne’e laiha,” abitante ne’e hateten.

“Ami iha-ne’e kuandu serbisu seluk, hanesan agora daudaun Cesta Bázika nia iha Hali-Mesak foin lalais ne’e ami para, maibé servisu ne’e hotu tiha ami kontinua baku fali, tanba serbisu agora ne’e ema idak-idak haree ninia suku, ami labele ba tama fali iha ema suku seluk nia”Victór dehan.

Fatuk britas ne’e faan ret ida ho folin $20 to’o $40 ba emprezáriu sira-ne’ebé kaer obra estadu nian inklui komunidade sira, iha postu administrativu Bobonaro, suku 18 ho postu administrativu Lolotoe suku hitu.

Notísia relevante: WVTL aprezenta dadus dezastre naturál iha Aileu-Baucau-Bobonaro-Covalima

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!