BOBONARO, EKONOMIA, HEADLINE, MUNISÍPIU

Xefe suku Odomau ezije governu aselera projetu estrada urbana Maliana

Xefe suku Odomau ezije governu aselera projetu estrada urbana Maliana

Xefe suku Odomau, Cirilo Moniz Cirio Bere. Imajen Tatoli/Sérgio da Cruz.

BOBONARO, 05 agostu 2022 (TATOLI) –  Xefe suku Odomau, postu administrativu Maliana, munisípiu Bobonaro, Cirilo Moniz Cirio Bere, husu  no ezije governu liu hosi Ministériu Obra Públika (MOP) atu aselera projetu estrada urbana kapitál Maliana ho distánsia kilómetru 25.

Projetu ne’e Konsellu Administrasaun Fundu Infraesturtura (CAFI, sigla portugés) aprova ona iha loron 03 fulan-agostu, ne’ebé aprezenta hosi Diretora Ezekutiva Sekretariadu Grande Projetu (SGP), Odete Costa Victor, akompaña hosi Diretór Jerál Obra Públika, Rui Hornai, hanesan na’in iha reuniaun CAFI.

Notísia relevante: KAFI aprova tan projetu tolu hosi MOP

“Ha’u rekomenda ba governu, liuliu ministériu kompetente atu aselera prosesu hotu.hodi nune’e bele implementa, tanba tinan barak ita-nia povu hein hela, atu nune’e governu bele rezolve estrada área Maliana Vila, atubele asesu ba estrada,” nia ko’alia iha sentru saúde Maliana, sesta ne’e.

Bazea ba deklarasaun hosi Ministru Obra Públika, Abel Pires, katak projetu ne’e iha ona faze aprovizionamentu hosi Komisaun Nasionál Aprovizionamentu (CNA, sigla portugés), maibé ninia implementasaun sei kle’ur uitoan tanba ho orsamentu ne’ebé boot.

Enkuantu totál orsamentu ba estrada boot, urbana no munisipál ho distánsia kilometru 25  ne’e ho pakote rua, ida sei gasta millaun $16 no pakote seluk sei gasta millaun $20-resin.

“Ha’u hanoin kestaun orsamentu ne’e fila-fali ba iha kompeténisa governu atu deside, maibé politikamente sira implementa programa bazea ba kustu ne’ebé sira tau ona iha polítika, ami-nia ezijénsia mak ne’e, kuandu promete governu tenke responsabiliza hodi ezekuta promesa ne’e,” nia hateten.

Xefe suku Holsa, postu administrativu Maliana, António Santa Cruz, sente kontente tanba governu tau ona prioridade rezolve estrada refere iha tinan ne’e, maibé nia sujere presiza implementa iha tempu badak, tanba situasaun klima iha rai laran kuandu tempu udan monu rai estrada urbana iha Maliana sei aat barak liután.

“Ami hanesan lideransa komunitária sei la ko’alia kona-bá kestaun polítika, maibe ami ko’alia kona-bá parte tékniku ninian,” nia katak.

Tuir dadaus CVRS períodu  II (1 jullu to’o 31 dezembru 2018), diresaun estatístika munisípiu Bobonaro iha aldeia 192, suku 50, postu administrativu neen ho totál populasaun  114,537, kompostu hosi mane 57,462, feto 57,075, ho totál uma-kain 24,591.

Notísi relevante:Apoia Projetu Estratéjiku Sira, KAFI Propoin Millaun $382

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!