DILI, 10 novembru 2022 (TATOLI)—Reitór Universidade da Paz (UNPAZ), Adolmando Soares Amaral, hateten feto presiza involve an iha vida polítika nune’e hetan oportunidade no iha responsabilidade hod9i kontribui muda sosiedade nia moris di’ak.
“Ha’u husu ba feto sira atu prepara-an liu-liu ba kapasidade intelektuál no kapasidade manajeriál maibé ho ida-ne’e de’it la to’o, presiza involve-an iha vida politika atu bele hetan oportunidade. Bainhira ita-boot sira hetan ona oportunidade, tenke iha responsabilidade no iha fuan ba povu no rai ida-ne’e, hodi nune’e bele kontribui ho di’ak no muda sosiedade nia moris ho di’ak liután,” Reitór UNPAZ ne’e hateten liuhosi komunikadu imprensa ne’ebé Agência Tatoli asesu, kinta ne’e.
Eis Ministra MSS, Maria Domingas Fernandes Alves “Micato”, hateten loron nasionál feto presiza fó omenajen ba eroina sira hotu iha Timor-Leste.
“Hato’o omenajen ba heroina sira hotu hanesan Maria Tapo ho nia maluk sira seluk, tanba ho sira-nia domin, sakrifísiu no mate ba rai ida-ne’e mak ohin loron ita bele hetan ukun rasik-an. Haree ba prespektiva polítika katak hahú hosi ukun-an to’o ohin loron feto barak mak hetan ona oportunidade iha instituisaun Estadu nian, maibé presiza nafatin unidade no komunikasaun ne’ebé mak di’ak atu bele halo buat ruma ne’ebé di’ak liután ba ita-nia konstrusaun Estadu ida ne’e,” nia dehan.
Micato hateten, feto labele sai hanesan instrumentu ba projetu maibé uza kapasidade ne’ebé iha hodi kontribui ba nasaun.
Reprezentante Ministra Solidariedade Sosiál no Inkluzaun (MSSI), Diretór Jerál Administrasaun Finansa no Rekursu Umanu, Rui Manuel Gago Exposto, hateten daudaun ne’e feto hahú hetan ona oportunidade iha instituisaun hotu-hotu, hahú hosi Parlamentu Nasionál ne’ebé iha 40%, membru Governu 15%.
Nune’e, MSSI konvida feto maluk hotu-hotu inklui komunidade LGBTI atu servisu hamutuk hodi kontribui no halo mudansa ba sosiedade ninia moris ho di’ak liután iha futuru.
Diretór Jerál MSSI, Florencio Pina Dias Gonzaga, hato’o parabéns ba feto Timor-Leste liu-liu feto MSSI no mós apresia no enkoraja feto sira atu hahú prepara an no envolve iha vida polítika.
Jornalista : Osoria Marques
Editór : Cancio Ximenes
