Top

MAPKOMS: Estadu tenke fó kontribuisaun haforsa nafatin setór komunikasaun sosiál

Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Antonio Daciparu

DILI, 10 novembru 2022 (TATOLI)–Ministru Asuntu Parlamentar no Komunikasaun Sosiál (MAPKOMS), Francisco Jerónimo Martins, hateten atu haforsa no garante ezisténsia setór komunikasaun sosiál iha Timor-Leste, presiza Estadu nia kontribuisaun nune’e asegura liberdade imprensa no liberdade espresaun.

“Estadu tenke fó kontribuisaun atu haforsa nafatin setór komunikasaun sosiál nian, ida-ne’e inklui responsabilidade atu asegura liberdade no independénsia órgaun públiku komunikasaun sosiál nian relasiona ho poder polítiku no mós garante ezisténsia serbisu públiku rádiu no televizaun,” Governante ne’e hateten ba jornalista sira iha salaun Delta Nova, Dili, kinta ne’e.

MAPKOMS nia funsaun mak atu halo konsetu, ezekusaun, koordenasaun no avaliasaun polítika públika ba área komunikasaun sosiál. Tuir artigu 16 hosi dekretu-lei númeru 20/2020, 28 fulan-novembru no fulan-maiu alterasaun dahuluk ba dekretu-lei númeru 14/2018, loron 17 fulan-agostu kona-ba orgaun VIII Governu konstituisionál.

Tanba ne’e mak Ministériu Asuntu Parlamentár no Komunikasaun Sosiál define asuntu prioridade haat mak dahuluk relasiona ho lejislasaun no regulamentasaun ne’ebé presiza ba área komunikasaun sosiál.

“Ita hotu hatene lei komunikasaun sosiál sempre iha, ita iha lei númeru hira maibé ita mós presiza lei rádiu fuzaun ne’ebé oras ne’e ministériu halo esforsu hela hamutuk ho parlamentu sira diskute hotu ona hein de’it halo aprovasaun globál iha parlamentu nasionál,” nia ehan.

Daruak, haforsa setór komunikasaun sosiál nian hodi garante liberdade no independénsia, Governu tenke fó forsa ba setór komunikasaun sosiál sira. Datoluk fó tulun ba komunikasaun sosiál atu promove identidade no kultra povu Timor-Leste nian.

“Ida-ne’e importante tebe-tebes durante ne’e, ne’ebé ita haree mídia hotu-hotu ko’alia mak polítika, ko’alia mak asuntu selu-seluk de’it, kultura ita nunka fó atensaun. Espasu kiik-oan hela. Entaun presiza tan peskiza ida para haree espasu iha ka lae ba iha mídia sira, haree ba iha kultura timor nian no dahaat mak atu garante supertendénsia tutela ba órgaun komunikasaun sosiál nian,” nia hateten.

Tanba ne’e mak Estadu tenke asegura polítika no fó apoiu ba hodi garante imprensa sira para bele ba nafatin oin, forte tanba jornalista sira tenke iha kbiit labele halo serbisu ida ba presaun polítika no ekonómiku.

Nune’e, nia dehan, hadi’a demokrásia Governu tenke aumenta nafatin asesu domokrátiku ba meiu komuniasaun sosiál sira iha Timor-Leste, diversifika fonte hotu ne’ebé ema hotu bele asesu ba no garante independénsia hosi mídia relasiona ho poder polítiku, liberdade komunikasaun sosiál sira hanesan direitu ne’ebé konsagra iha artigu 41 konstituisaun repúblika demokratika Timor-Leste nian, nune’e Estadu tenke garante regulasaun média nian atu evita violasaun direitu fundametál seluk tan.

Jornalista : Osoria Marques

Editór      : Cancio Ximenes

Publisidade

Leave a Reply

Latest Post

error: Content is protected !!