iklan

DILI

PR Horta: “Ba oin, Korea bele loke fábrika ruma iha TL”

PR Horta: “Ba oin, Korea bele loke fábrika ruma iha TL”

Prezidente Repúblika, José Ramos Horta. Imajen Tatoli/Francisco Sony

DILI, 10 novembru 2022 (TATOLI)—Prezidente Repúblika, José Ramos Horta, partisipa komemorasaun loron nasionál Korea nian ne’ebé hala’o iha Hotel Timor no mós tinan 20 relasaun diplomátika entre Timor-Leste no Korea Súl.

Xefe Estadu, José Ramos Horta, hateten relasaun bilaterál entre Seoul no Díli bele aposta ba kooperasaun ekonómika, liu-liu ba oin Korea Súl bele loke fábrika ruma iha Timor-Leste.

“Relasaun entre rai rua, Timor-Leste ho Korea metin loos no di’ak. Ha’u espera hanesan Governu iha Korea, povu iha Korea, sira mós kontente halo relasaun ho Timor. Ha’u espera relasaun ne’e sei aumenta. Ba oin ita bele buka hakat ba investimentu, nune’e sira bele loke fábrika ruma iha ne’e, kontribui ba Timor nia dezenvolvimentu, kontribui ba empregu iha rai-laran,” Prezidente Repúblika, José Ramos Horta, hateten liuhosi komunikadu imprensa ne’ebé Agência Tatoli asesu, kinta ne’e.

Tuir Xefe Estadu, relasaun bilaterál entre nasaun rua sei sólida tanba Timor-Leste no Korea Súl iha história ne’ebé hanesan no sofre invazaun oioin, maibé interresadu loos atu apoia Timor-Leste.

“Ha’u fi’ar, tanba ohin kalan mós ema kompañia boot mós mai, primeiru kompañia boot iha Korea mak mai, ha’u iha esperansa ké sei aumenta liután relasaun ho Korea Súl. Ita-nia joven sira mós kontente estuda língua Koreanu, ha’u espera ké sei bele kontinua ba Korea ba futuru tanba povu Korea haree istória Timor nian hanesan sira-nian,” nia hateten.

Entretantu, partisipa iha serimónia refere mak membru governu, kórpu diplomátiku no mós Kargu Xefia hosi liña ministériál, prezidente hosi ajénsia autónoma sira, reprezentante hosi autoridade defeza no seguransa no seluk tan.

Serimónia ne’e, taka ho aprezentasaun múzika tuir kultura Korea nian, aprezentasaun hosi grupu Taekwondo Timoroan sira, nomos dansa kulturál suru-boek hosi grupu Lejiaval.

Jornalista : Osória Marques 

Editór       : Cancio Ximenes

iklan
iklan

Leave a Reply

iklan
error: Content is protected !!