DILI, 15 novembru 2022 (TATOLI)–Reitór Universidade da Paz (UNPAZ), Adolmando Amaral, husu ba deputadu sira iha Parlamentu Nasionál (PN) atu labele sente alerjia ho deklarasaun estudante sira ne’ebé envolve iha asaun pasífika.
“Ha’u hanoin deputadu sira labele alerjia ho insultu sira ne’ebé maka manifestante hato’o ba sira tanba sira nu’udar reprezentante povu iha uma fukun,” Reitór Adolmando hateten ba Agênica Tatoli, via telefónika, tersa ne’e.
Nia dehan, karik asaun pasífika kontra PN ne’e maka iha liafuan kro’at hasoru deputadu sira.
“Loloos deputadu sira mak tenke husu ba ida-idak ninia-an, tanba sá mak estudante sira bele hasai liafuan kro’at hasoru sira. Karik durante ne’e deputadu sira keta halo buat ruma laloos maka estudante sira asalta sira ho liafuan kro’at sira,” nia akresenta.
Notísia relevante: AMN propoin halakon desizaun sosa karreta ba deputadu ho períodikamente
Maski nune’e, hanesan líder akadémiku, nia husu ba estudante sira atu nafatin respeita no konsidera órgaun soberanu sira no nia hakarak atu manifestante sira kontrola malu hodi sukat nafatin linguajen ne’ebé atu hasai ba deputadu sira.
“Ha’u husu ba na’i deputadu sira atu nafatin haree ba parte pozitivu de’it, tanba ne’e lalika sente alerjia ho liafuan kro’at, tanba iha asaun hanesan ne’e sempre envolve ema barak ne’ebé mai ho hanoin la hanesan,” nia tenik.
Iha asaun pasífiku ne’e, UNPAZ mai ho ezijénsia tolu, ne’ebé husu ba PN atu kansela sosa karreta ho kondisaun tenke asina paktu ruma, aselera lalais lei pensaun vitalisia, inklui ezije ba PN atu altera lei ba manifestante sira.
“Ami-nia ezijénsia sira ne’e ohin hato’o ona ba meza Parlamentu Nasionál. Ami fiar katak sira haree ona no ami hein de’it saida maka sei kontinua ba oin,” nia dehan.
Jornalista : Tomé Amado
Editora : Juia Chatarina
