iklan

NASIONÁL, HEADLINE, KAPITÁL

Reitór UNTL rejeita fó lisensa ba estudante halo manifestasaun hasoru PN

Reitór UNTL rejeita fó lisensa ba estudante halo manifestasaun hasoru PN

Estudante no joven sira ne’ebé halibur-an iha Aliansa Maubere Nasionál (AMN) halo asaun protestu hasoru desizaun Parlamentu Nasionál atu sosa karreta no laptop foun ba deputadu sira, iha kampus sentrál UNTL oin, segunda (14/11). Imajen Tatoli/Francisco Sony

DILI, 15 novembru 2022 (TATOLI)–Reitór Universidade Nasionál Timor-Lorosa’e (UNTL), João Soares Martins, rejeita deklarasaun deputadu sira iha Parlamentu Nasionál (PN), ne’ebé hateten katak nia mak autoriza estudante halo manifestasaun iha kampus sentrál hodi kontra desizaun deputadu sira.

“Ami iha UNTL la hetan koñesimentu no nunka fó lisensa ba estudante sira hosi Aliansa Maubere Nasionál (AMN) atu halo protestu hasoru parlamentu Nasionál iha resintu kampus UNTL,” Reitór João hato’o deklarasaun liuhosi konferénsia imprensa iha Fakuldade Enjeñaria, Siénsia no Teknolojia (FECT, sigla portugés), Hera, tersa ne’e.

Nia konsidera, estudante sira hanesan sidadaun ne’ebé iha direitu atu espresa protesta tanba iha Konstituisaun RDTL lei garante liberdade espresaun ba ema hotu.

“Nu’udar Reitór, ha’u la konkorda bainhira estudante sira utiliza fasilidade Estadu hodi halo manifestasaun kontra filafali órgaun soberanu sira,” nia akresenta.

Notísia relevante: AMN propoin halakon desizaun sosa karreta ba deputadu ho períodikamente

Aleinde ne’e, nia kestiona partisipasaun Reitór Universidade da Páz (UNPAZ), Adolmando Amaral, tanba organiza estudante sira hamutuk AMN hodi halo asaun pasífika kontra PN iha resintu kampus UNTL.

“Ami lamenta tebes tanba Reitór UNPAZ organiza mós ninia estudante sira mai partisipa iha asaun pasífika hamutuk ho AMN iha UNTL hodi hasoru Parlamentu Nasionál. Loloos Reitór tenke halo konfirmasaun uluk ho ami molok atu envolve-an iha asaun ne’e,” nia tenik.

Iha fatin ketak, Reitór Adolmando Amaral, halo auto defeza hodi hateten nia partisipasaun hamutuk ho estudante iha asaun pasífika tanba hetan konvite hosi komisaun.

“Ha’u hakarak hateten, UNPAZ mós lakohi tuun ba aproveita iha resintu UNTL hamutuk ho estudante sira seluk halo manifestasaun, maibé tanba ami hetan karta konvite formál no halo mós komfirmasaun ho parte seguransa katak asaun pasífika ne’e hetan ona lisensa, tanba ne’e mak ita organiza malu hodi tuun halo asaun hamutuk ho estudante sira iha UNTL,” nia dehan.

Nia dehan, hanesan Reitór ida, sente hakfodak kuandu uma-na’in (Reitór UNTL) rasik deklara katak sira la hetan karta koñesimentu hosi komisaun.

“Ida-ne’e halo ami hanesan bainaka sente hakfodak, maibé asaun ka situasaun sira ne’ebé akontese daudaun ne’e fanu ema hotu atu tau responsabilidade ba asuntu ne’ebé estudante sira hatudu daudaun ne’e,” nia salienta.

Jornalista   : Tomé Amado

Editora         : Julia Chatarina

iklan
iklan

Leave a Reply

iklan
error: Content is protected !!