DILI, 17 novembru 2022 (TATOLI)—Prezidente Repúblika, José Ramos Horta, husu atu Governu tenke trata setór privadu nasionál hotu-hotu hanesan no labele politiza tanba ne’e implika ba kresimentu setór ekonómiku.
“Setór privadu nasionál hanesan ajente ba ekonómia Timor nian no la’o ba oin ho kreatividae no korajen. Governu no Estadu iha kotuk ho ambiente ida-ne’ebé di’ak no ho setór justisa ne’ebé predizivel, kredivel, labele halo fali jogada polítika. Governu mak tenke hatudu matenek, kuandu iha poder mobiliza hotu-hotu, atu halo entrepreneur boot ida ba setór privadu hotu-hotu,” Prezidente Repúblika, José Ramos Horta, hateten liuhusi nia intervensaun IV Kongressu nasionál ho tema “Haforsa setór privadu mais kreativu, produtivu no sustentavel” iha Hotél Novu Turizmu, kinta ne’e.
Xefe Estadu mós husu atu Governu apoiu setór privadu nasionál la’ós tanba partidu polítiku, maibé independentemente apoiu setóor privadu tanba sira-nia direitu duni.
Entretantu Deputadu Partidu Demokrátiku, Mariano Asanami Sabino, hateten setór privadu ne’e paralelu importante ho setór mak setór Governu, setór privadu no setór sosiedade sivil, ne’ebé parseria ida-ne’ebé hanesan la’ós iha Governu nia okos, tratamentu ida-ne’e halo hanesan iha Governu nia okos ne’e mak ladún la’o di’ak.
“Dala ruma membru Governu ida labele dadalia ho setór privadu tanba ema deskonfia dehan karik fó osan, tanba ne’e nu’udar deputadu ha’u sempre defende no hatene loloos katak sé mak bele kria kampu servisu ne’e, só setór privadu,” nia dehan.
Governu ne’e fasilita no regula, Governu mobiliza no organiza, no Governu iha mundu tomak ninia funsaun haat importante mak nia ukun tenke fo estabilidade, nia tenke fo garantia atu ema hotu-hotu bele servisu bele investe setór privadu sira tenke la’o.
Nune’e, sasukat ida seluk mak Governu tenke hasa’e rendimentu ba nasaun ne’e mai hosi kriasaun ne’ebé setór privadu sira mak halo, ne’e iha nasaun no fatin ne’ebé de’it no atu susesu ka la susesu Governu mak tenke kria servisu maibé la’ós atu foti Estadu nia osan mak kria kampu servisu.
“Ita agora ne’e depedente de’it osan boot hosi fundu mina-rai, nune’e atu kria kampu servisu liuhosi setór privadu tenke mais kreativu liután atu kria kampu servisu barak liután. Ita ohin problema boot liu mak krize kampu servisu ba joven sira, entaun ha’u hanoin sasukat ikus liu mak balansu pagamentu ne’e saida mak ita haree ba li’ur no saida mak ita haruka ba iha li’ur ne’e setór privadu. Tanba ne’e mak setór privadu mak elementu xave ida iha nasaun, nune’e nasaun ne’e susesu ho di’ak ba oin,” nia hateten.
Jornalista : Osória Marques
Editór : Cancio Ximenes
