Televizaun ABC hakarak materializa kooperasaun ho mídia sira iha TL

DILI, 17 novembru 2022 (TATOLI)–Prezidente Konsellu Administrasaun Rádiu no Televizaun Timor-Leste, Empreza Públika (RTTL, E.P) José António Belo ‘”Taraleu”, hateten televizaun ABC hakarak materializa kooperasaun ho RTTL no mídia sira iha Timor-Leste.
Prezidente Repúblika, José Ramos Horta, kinta ne’e, simu audiènsia hosi ekipa televizaun Australian Broadcasting Cooperation (ABC) hodi ko’alia kona-ba akordu kooperasaun ne’ebé estabelese ona ho mídia sira iha Timor-Leste.
“Ohin kolega sira mai informa ba Prezidente Repúblika saida mak sira sei halo atu apoiu mídia sira iha Timor-Leste liu-liu ba RTTL relasiona ho nota entendimentu ne’ebé mak asina ona entre RTTL ho ABC kona-ba troka konteudu no hanorin dalen Inglés liuhosi televizaun,” Prezidente RTTL, José Belo, hateten liuhosi komunikadu imprensa, ne’ebé Agência Tatoli asesu, kinta ne’e.
José Belo hatutan, RTTL ho televizaun ABC sei asina akordu kooperasaun iha área formasaun no kapasitasaun lian Iinglés ba mídia sira iha Timor-Leste, inklui harii seksaun lian inglés iha RTTL.
Lead International Development Public Affairs, Jo Elsom, hateten enkontru ho Xefe Estadu ne’e ko’alia liu kona=ba importánsia mídia no liberdade ba mídia nian, tanba midia broadcasters nasionál nia papel mak promove interrese públiku nian no mós apoiu sidadaun sira atu asesu ba informasaun.
“Ami agradese tebes ho Prezidente Repúblika, ami ko’alia liga ba dezenvolvimentu mídia nian no oinsá atu servisu hamutuk mídia iha Timor hodi harii kapasidade no “skill” ho matenek ne’ebé ami iha no mos ami sei apreende buat balun hosi mídia iha Timor, nune’e bele kria relasaun área jornalizmu,” nia dehan.
Jo Elsom mós agradese ba Prezidente Repúblika, José Ramos Horta, bele disponibiliza nia tempu hodi hasoru malu no sira hosi televizaun ABC.
Jornalista : Osoria Marques
Editór : Cancio Ximenes

