iklan

DILI

Matadalan reportajen eleitorál ba jornalista sei evita notísia falsa

Matadalan reportajen eleitorál ba jornalista sei evita notísia falsa

Reprezentante mídia nasionál hasai retratu hamutuk hafoin simu no lansa livru matadalan reportajen eleitorál ba jornalista sira iha Otél Novu Turizmu, Lecidere, tersa (22/11). Imajen Tatoli/Osória Marques.

DILI, 22 novembru 2022 (TATOLI)–Reprezentante Vise-Rezidente PNUD, Adeline Carrier, hateten matadalan reportajen eleitorál ba jornalista ei evita notísia falsa ba públiku iha eleisaun parlamentár 2023.

Lansamentu livru matadalan reportajen eleitorál ba jornalista sira iha Otél Novu Turizmu, Lecidere, tersa (22/11). Imajen Tatoli/Osória Marques.

“Ita komprometidu atu fó apoiu eleisaun tuir mai no ohin lansa ona matadalan ne’e. Ami hanoin katak importante ba ita-boot sira atu utiliza no halo tuir matadalan, nune’e evita notísia falsa hodi ita bele kontribui no fasilita informasaun di’ak ba públiku hotu iha Timor-Leste,” Adeline Carrier hateten ba jornalista sira, hafoin lansa matadalan reportajen eleitorál ba jornalista no mídia, iha Otél Novu Turizmu, tersa ne’e.

Tuir nia, lansamentu ba livru reportajen eleitorál ne’e importante tebes ba jornalista sira-nia papél atu asegura katak sidadaun hotu-hotu iha asesu ba informasaun ne’ebé loos no adekuadu kona-ba eleisaun sira iha futuru.

“Mídia esensiál tebes ba eleisaun ne’ebé susesu no pasífika. Atu asegura katak votante sira bele foti desizaun ho informasaun ne’ebé iha, sira tenke iha asesu ba informasaun ne’ebé justu, loos, no kobertura luan kona-ba partidu polítiku no kandidatu sira-ne’ebé sira vota ba,” nia hateten.

Iha kazu hanesan ne’e, matadalan relatóriu eleitorál sira-ne’e asegura katak jornalista no mídia sira hatán ba prinsípiu sira kona-ba reportajen responsável kona-ba polítika inkluziva no eleisaun sira.

Tanba ne’e, Conselho de Imprensa (CI), ho Programa Nasaun Unida ba Dezenvolvimentu (PNUD) iha Timor-Leste, ohin, lansa ona matadalan reportajen eleitorál ba jornalista no mídia sira iha prosesu kobertura ba eleisaun parlamentár.

“Lansamentu matadalan ne’e oportunu tebes tanba iha fulan hirak tuir mai, ita sei iha eleisaun lejislativa. Ha’u fiar katak jornalista timoroan sira-nia kobertura kona-ba eleisaun sei kompreensivu liu kompara ho eleisaun iha pasadu. Pelumenus sira tenke hatene ho di’ak kona-ba mekanizmu no siklu eleitorál,” reprezentante Konsilleiru Conselho de Imprensa (CI), Espedito Dias Ximenes, hateten.

PNUD lansa ona matadalan ba jornalista sira atu kobre eleisaun parlamentár, jornalista sira hosi mídia nasionál sira halibur hamutuk iha loron 22 novembru hodi tuir lansamentu hosi publikasaun matadalan ba jornalista no mídia kona-ba reportajen eleisaun no manuál ida-ne’e Konsellu Imprensa dezenvolve ona liuhosi projetu eleisaun reziliente COVID-19 iha Timor – Leste (CORE-TL) hodi fasilita kobertura siklu eleitorál nian.

Matadalan sira-ne’e universál no kompreensivu kona ba kobertura eleitorál ba eleisaun tuir mai iha Timor-Leste, iha konsultasaun ho PNUD, jornalista sira, Órgaun Administrasaun Eleitoral (OAE), partidu polítiku sira no observadór eleitorál sira no seluk tan.

“Étika kona-ba kobertura eleitorál ba relasaun entre partidu polítiku sira, Órgaun Administrasaun Eleitorál sira no informasaun públiku durante periodu eleisaun, no mós planeamentu no metodolojia kona-ba kobertura eleitorál sira. Importánsia hosi matadalan sira-ne’e bainhira regula responsabilidade jornalizmu no prátika étika iha relatóriu eleitorál ne’ebé jornalista no mídia sira tenke halo tuir,” nia dehan.

Reprezentante Embaixador Japaun iha Timo-Leste, Kazumi Yamada, hato’o parabens ba Conselho de Imprensa taba kontribuisaun hosi matadalan sira-ne’e ba hari’i demokrasia iha nasaun ne’e.

“Ha’u hakarak fó parabéns ba Conselho de Imprensa (CI) hodi kompilla matadalan ida-ne’e ho susesu. Hanesan ita hatene, eleisaun livre no justu bazea iha informasaun ne’ebé loos fundasaun importante ba demokrasia. Ha’u foti oportunidade ida-ne’e atu fó hanoin ba jornalista sira no mídia kona-ba importánsia hosi papél ne’ebé sira asume, tanba timoroan sira sei ba vota iha eleisaun parlamentár tuir mai no mós eleisaun demokrátika seluk tan iha futuru,” nai hateten.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!