iklan

DILI

UNFPA-MPCM diskute kestaun saúde inan no empregu juventude

UNFPA-MPCM diskute kestaun saúde inan no empregu juventude

Inan Feton isin rua sira bainhira ba iha Centru klinika Formosa hodi Cek up ba sira nia bebe, Tersa 5 Otubru 2021.Imaje Tatoli/Antonio Goncalves

DILI, 22 novembru 2022 (TATOLI)—United Nations Population Fund (UNFPA, sigla inglés) no Ministru Prezidénsia Konsellu Ministru (MPCM, sigla portugés) diskute kestaun kona-ba saúde materna no kapasitasaun juventude.

Diretór UNFPA, Pressia Arifin Cabo, hateten ohin enkontru ho Ministru Prezidénsia Konsellu Ministru, Fidelis Manuel Leite Magalhaes, hodi ko’alia kona-ba asuntu esensiál rua ne’ebé foka liu ba asuntu saúde inan no juventude.

“Ami preokupa ho saúde inan nian, ne’ebé atu kombate raes badak no mánutrisaun no mós kestaun juventude ne’ebé foka liu ba kapasitasaun. Nune’e, sira bele iha abilidade atu hetan oportunidade servisu,” Diretor UNFPA ne’e hateten ba jornalista sira iha Palásiu Governu, tersa-ne’e.

Nia dehan, aumenta feto isin-rua 15% mak risku liu ba mate tanba sirkunstánsia ne’ebé haleu hanesan mánutrisaun no raes badak.

Nune’e, nia hateten, presiza kuidadu nutrisaun ba inan isin-rua no labarik sira, tanba maiória saúde inan nian bele afeta hosi raes badak no fase hanesan ho problema mánutrisaun hotu-hotu.

Asuntu daruak foka liu ba asuntu juventude tanba tuir sensu populasaun tinan 2022, hanesan 74% hosi populasaun iha Timor-Leste tinan 35 mai kraik.

“Presiza halo tan buat barak atu envolve foinsa’e sira iha empregu, edukasaun, no asesu ba kuiñesimentu no abilidade. Nune’e, UNFPA mai ho proposta integradu hodi diskute ho Ministru Prezidénsia Konsellu Ministru atu envolve asuntu importante rua,” nia dehan.

Ministru Prezidénsia Konsellu Ministru, Fidelis Magalhães, hateten UNFPA no Governu Timor-Leste tenke foka liu ba servisu hodi kombate saúde inan nian no bele envolve iha kestaun juventude sira-nian.

“Ami hala’o de’it inisiativa ki’ik sira kona-ba implementasaun programa juventude nian hanesan kapasitasaun ba foinsa’e sira. Nune’e, ita tenke foku ba programa espesiál ba foin-sa’e sira hodi fó impaktu boot ba sira-nia moris,” nia hateten.

Nia rekoñese katak sei iha buat ki’ik ne’ebé Timor-Leste halo maibé parseiru dezenvolvimentu balun foka liu ba programa espesífiku ba kapasitasaun juventude.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!