iklan

DILI

Embaixada EUA no CCI-TL fó formasaun ba emprezáriu feto 60

Embaixada EUA no CCI-TL fó formasaun ba emprezáriu feto 60

Embaixadór EUA iha Timor-Leste, Tom Daley. Imajen/Espesiál.

DILI, 22 novembru 2022 (TATOLI)—Embaixada Estadu Unidu Amérika iha Timor-Leste hamutuk ho Cámara Comérsiu no Indústria Timor-Leste (CCI-TL) fornese segundu faze akadémiku ba emprezáriu feto foinsa’e hamutuk 60 hala’o sira-nia negósiu iha Timor-Leste.

Embaixadór EUA iha Timor-Leste, Tom Daley, hateten onra boot ida atu sai parseiru ho CCI-TL hodi kontinua fornese segundu faze kapasitasaun ba feto foinsa’e timoroan hamutuk 60.

“Ami kontente atu apoiu programa formasaun ba feto emprezáriu timoroan na’in-60 atu sai líder ba sira-nia negósiu. Ho ida-ne’e, kontinua enkoraja foinsa’e timoroan sira kona-ba sira-nia kompromisu atu hetan kuiñesimentu barak liután durante períodu formasaun,” Daley hateten ba jornalista sira iha Acait, Dili, kuarta ne’e.

Embaixada Estadu Unidu fó ona osan balun atu apoia formasaun ne’e no osan ne’e bele fó fini ba apoiu hodi hala’o sira-nia negósiu.

“Estadu Unidu kontente tebes atu ajuda Timor-Leste hodi hakbiit feto Timor no dezenvolve ekonomia nasaun, liu-liu Timor-Leste nia ekonómia rekuperasaun ne’ebé sofre durante COVID-19,” nia dehan.

Prezidente CCI-TL, Jorge Manuel Araujo Serano, hateten formasaun ida-ne’e hanesan fundamentál ba emprezáriu feto foinsa’e timoroan sira atu hetan kuiñesimentu no abilidade di’ak hodi dezenvolve sira-nia negósiu.

Feto timoroan sira iha potensialidade boot tebes atu envolve-an iha atividade emprezariál, ne’ebé kontribui ba dezenvolvimentu ekonómiku Timor-Leste nian no mós fó oportunidade servisu nian ba ema seluk.

Nune’e, nia enkoraja partisipante sira atu labele rende-an bainhira hala’o atividade negósiu, se lae dezafiu barak mak emprezáriu foinsa’e sira hasoru maibé tenke reziliente ba atividade negósiu.

Formasaun ne’e foka liu ba asuntu importante tolu ne’ebé dezenvolve idea negósiu, hahú negósiu no jestaun negósiu.

“Feto sira tenke fó ideia kreativu no inovativu sira ba produtu ida-ne’ebé hatán ba nesesidade sira. Nune’e, formasaun ne’e sei hala’o durante semana rua ba feto foinsa’e timoroan hamutuk 60,” nia hateten.

Programa kapasitasaun ne’e finansia hosi Estadu Unidu Amérika ho valór $40.000, no atividade ba faze dahuluk nian ne’ebé halo iha tinan 2021 ba foinsa’e timoroan hamutuk 30.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!