BAUCAU, 02 dezembru 2022 (TATOLI)-Primeiru Ministru (PM), Taur Matan Ruak, sei hatuur fatuk dahuluk ba projetu reabilitasaun no konstrusaun estrada diresaun postu administrativu Laga ba Baguia no Uai-aka ba Quelicai iha loron 09 fulan-dezembru tinan ida-ne’e.
Diretór Serbisu Munisipál Obra Públika Baucau, Pedro Alexandre Guterres Perreira, esplika liuhosi sorumutu entre autoridade munisipál ho Vise-Ministru Obra Públika, Nicolau do Reis, deside atu halo serimónia lansamentu fatuk dahuluk ba estrada diresaun rua refere iha loron 09 fulan-dezembru, semana oin.
“Ita hamutuk buka dalan atu koordena ho autoridade lokál sira, nune’e tuir planu iha loron 09 fulan-dezembru sei halo serimónia lansamentu fatuk dahuluk,” Diretór Obra Públika Baucau informa ba Tatoli, iha Vila Nova, sesta ne’e.
Koordenasaun hala’o relasiona ho prosesu kulturál no mobilizasaun komunidade nune’e bainhira prosesu reabilitasaun no konstrusaun hala’o labele mosu problema ruma tanba sei partisipa direta hosi Primeiru Ministru, Taur Matan Ruak.
Prosesu reverifikasaun iha diresaun postu Laga no Baguia finaliza ona no hein indemnizasaun. Enkuantu nee iha fatin balun seidauk finaliza hanesan diresaun Uai-aka ba potu Quelicai, Laisorulai no Nahareka.
“Estrada rua refere sei halo serimónia dala-ida de’it, ne’ebé deside iha postu Laga no Uai-aka,” Pedro Perreira akresenta.
Tuir planu, hafoin serimónia refere kompañia responsável sei kontinua kedas mobilizasaun ekipamentu, instala edifísiu nune’e bele hahú kedas obra refere ho durasaun kontratu tinan-ida.
Estrada diresaun Laga-Baguia purvolta kilómetru 38 ho luan metru neen, responsabiliza hosi kompañia Norinco internasionál ho tipu reabilitasaun ho totál orsamentu millaun $21.7
Enkuantu diresaun Uai-aka, postu Quelicai, ba Nahareka munisípiu Viqueque purvolta kilómetru 28.
Jornalista : Natalino Belo
Editór : Evaristo Soares Martins
