iklan

NASIONÁL, HEADLINE, POLÍTIKA

Ministru Finansa otimista Prezidente Repúblika bele promulga OJE 2023

Ministru Finansa otimista Prezidente Repúblika bele promulga OJE 2023

Ministru Finansa, Rui Augusto Gomes. Imajen Tatoli/Francisco Sony

DILI, 05 dezembru 2022 (TATOLI)–Ministru Finansa (MF), Rui Augusto Gomes, otimista Prezidente Repúblika (PR), José Ramos Horta, bele promulga proposta-lei Orsamentu Jerál Estadu (OJE) 2023 ho montante globál biliaun $3,16.

“Karik Prezidente Repúblika veta OJE 2023, ita laiha orsamentu, signifika ita tama iha rejime doudesimál. Maibé ha’u fiar katak Prezidente Repúblika mós ema ida matenek, hadomi nasaun ida-ne’e, depois ida-ne’e mós orsamentu ikus liu ona, ne’ebé ha’u fiar katak sei iha konsiderasaun di’ak ba orsamentu ne’e,” Ministru Rui Gomes, hateten, hafoin reuniaun semanál ho Primeiru-Ministru, iha Palásiu Governu, segunda ne’e. 

Notísia relevante:PN aprova proposta-lei OJE 2023 biliaun $3,16 iha finál globál 

Ministru mós akompaña, daudaun públiku kontinua hamosu konfuzaun liga ho montante globál OJE 2023 ne’ebé boot.

“Ha’u hanoin sempre iha konfuzaun barak iha ema-nia hanoin kona-ba OJE 2023 ne’e boot, maibé atu dehan orsamentu ne’e la boot. Ita-nia orsamentu loloos ne’e biliaun $1,8 maibé tuir Lei Enkuadramentu Orsamentál obriga katak reseita hotu ho despeza tomak tenke hakerek iha OJE, nune’e labele iha dezorsamentasaun, tanba ne’e maka ita haree boot,” nia esplika.

Governante ne’e klarifika, Governu seidauk iha informasaun ligadu ho Prezidente Repúblika husu ba Tribunál atu halo fiskalizasaun ba OJE 2023.

Antes ne’e, Parlamentu Nasionál aprova ona proposta-lei númeru 46/v(5a) OJE 2023 biliaun $3,16 iha finál global, iha loron 17 novembru 2022 no iha loron tuir mai manda kedan ba Prezidente Repúblika.

Proposta-lei OJE 2023 ho montante billiaun $3,16, kompostu hosi orsamentu administrasaun sentrál biliaun $2,8 (montante ne’e inklui ona Fundu Kombatente Libertasaun Nasionál, biliaun $1), orsamentu seguransa sosiál millaun $235,7 no Rejiaun Administrativu Espesiál Oé-cusse Ambeno (RAEOA) millaun $120.

Orsamentu ne’e sei uza hodi finansia programa 45 liuhosi atividade prinsipál 275, organizadu  iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasona internasionál no polítika esterna.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!