iklan

BAUCAU, HEADLINE, MUNISÍPIU, SAÚDE

Saúde Baucau kontinua kombate dengue iha tempu udan

Saúde Baucau kontinua kombate dengue iha tempu udan

Diretór Servisu Munisipál Saúde Baucau, Domingos Reinaldo da Costa Guterres. Imajen Tatoli/Natalino Belo.

BAUCAU, 06 dezembru 2022 (TATOLI) – Ministériu Saúde (MS) liuhosi Servisu Munisipál Saúde Baucau kontinua kombate dengue liuhosi meiu prevensaun iha tempu udan.

Diretór Servisu Munisipál Saúde Baucau, Domingos Reinaldo da Costa Guterres, esplika, meiu prevensaun refere nu’udar promosaun, sensibiliza no rega ai-moruk abate.

“Ita esforsu atu ema hotu-hotu iha konsiénsia hodi uza maneira atu prevensaun moras dengue iha munisípiu Baucau,” nia informa ba Agência TATOLI iha Vila Antiga, tersa ne’e.

Liuhosi promosaun hodi hasa’e komunidade sira-nia koñesementu no iha konsiénsia atu halo limpeza jerál kada bairru to’o uma-laran.

Rega ai-moruk abate mesmu parte hosi prevensaun maibé seidauk efetivu nune’e presiza kontribusaun hosi autoridade suku to’o komunidade hotu atu hamoos ambiente ne’ebé larva ka knuuk susuk.

“Bainhira larva la kombate susuk kontinua moris no sei hamosu moras dengue ba komunidade,” Domingos Guterres akresenta.

Saúde Baucau kontinua esforsu atu kombate hanesan fahé ai-moruk abate kada uma-kain hodi utiliza ba tanke bee nune’e hamate larva.

Pontu importante hosi meiu prevensaun seluk mak hamoos tanki bee kada semana no prevene bee labele nalihun iha vazu ai-funan, haloot ropa no toba uza muskiteiru.

Tuir dadus hosi Saúde Baucau totál pasiente ne’ebé sofre moras dengue iha tinan-2022 hahú fulan-janeiru too novembru hamutuk 378 no rezulta pasiente nain-ida lakon vida.

Jornalista   : Natalino Belo 

Editór          : Evaristo Soares Martins 

iklan
iklan

Leave a Reply

iklan
error: Content is protected !!