SEJD-PNDS selebra akordu kooperasaun konstrui kampu komunitáriu iha suku sia
DILI, 13 dezembru 2022 (TATOLI)— Sekretária Estadu Juventude no Desportu (SEJD) ho Programa Nasionál Dezenvolvimentu Suku (PNDS) selebra akordu kooperasaun hodi implementa planu konstrusaun no rekonstrusaun ba kampu komunitáriu sia iha territóriu nasionál.
Suku sia ne’ebé sai benefisiariu hanesan suku Atabae-Bobonaro, suku iha Maliana, suku Hatulia B iha Ermera, Letefoho, Soibada-Manatuto, Quelicai-Baucau, Venilale, Viqueque, Afaloikai no Alas-Manufahi.
“Iha tinan ida ne’e ita uza pilotu liuhosi mekanizmu PNDS nian ho modelu dezenvolvimentu rurál, ne’ebé Governu halo ba kampu komunitáriu sira iha suku sia iha territóriu nasionál. PNDS mak ajuda hodi define kustu projetu nian”, dehan SEJD Abrão Saldanha iha Dili, tersa ne’e.
Projetu konstrusaun ba kampu komunitáriu hirak ne’e sei halo dala ida de’it ho totál kampu sia ne’e sei gasta osan $239.000 ne’ebé alokadu iha OJE 2022 nian hosi SEJD.
Projetu hirak ne’e hahú implementa iha fulan-dezembru to’o tinan oin ho tipu kampu multifunsaun hanesan basketball, volley boll no futsal.
Iha biban hanesan, Diretora Ezekutivu PNDS, Claudina Soares Pinto, agradese ba konfiansa hotu ne’ebé SEJD fó ba sira hodi servisu hamutuk, nune’e bele realiza projetu kampu komunitáriu iha suku sia iha Timór laran tomak.
PNDS sei utiliza nia rekursu hotu ne’ebé iha hodi garante atividade ne’e to’o ramata no tékniku PNDS nian sei nafatin iha suku sira atu hala’o servisu tuir orientasaun.
“Ami nia tékniku sira destakadu kedan iha Munisipiu, Postu Administrativu, Suku tuun to’o baze atu fó apoiu ba servisu tomak ne’ebé iha, liuliu ba tan servisu ne’ebé SEJD atribui mai ami”, katak nian.
Ho nune’e, nia garante servisu hotu sei la’o di’ak tanba servisu PNDS nian barak mak susesu no iha tinan ne’e PNDS tenke konklui projetu rihun-11 ne’ebé sai tarjetu ba PNDS iha 2022.
“Fiar katak projetu ne’ebé mak identifikadu ona junta ho SEJD nian hamutuk sia sei implementa ho di’ak no ami garante ho kualidade liuhosi ami nia ekipa tékniku sira,” nia kompromete.
Jornalista: Hortencio Sanchez
Editór : Florencio Miranda Ximenes
