UKL sia iha suku Lontas tama ona faze hada batako
BOBONARO, 16 dezembru 2022 (TATOLI)-Implementasaun programa Uma Kbiit Laek (UKL) regulár faze daruak hamutuk unidade sia iha suku Lontas, postu administrativu Lolotoe, munisípiu Bobonaro, tama ona faze konstrusaun hada batako.
Xefe suku Lontas, Alípio Belo, informa, UKL faze dahuluk tinan 2021 unidade tolu iha aldeia alvu mak Ozo, konklui ona tanba governu entrega ona ba benifesiáriu sira.
Notísia relevante: CCM Bobonaro hili Balibo-Maliana implementa UKL+
“Agora UKL 2022 nian hamutuk uma sia ne’e hahú ona konstrusaun tanba iha ona faze badaen sira hada batako, uma ne’e haat iha aldeia Piron, Ozo iha uma haat no uma ida iha aldeia Tasmil,” nia informa ba Tatoli, sesta ne’e.
Lideransa komunitária ne’e aprofunda, komunidade uma-kain sia ne’e sai benefísiariuriu hafoin ekipa verifikasaun hosi Programa Nasionál Dezenvolvimentu suku (PNDS), munisípiu Bobonaro akompaña hosi Ekipa Jestaun Suku (EJS), halo verifikasaun lubuk ida no deside katak família hirak-ne’e prienxe duni rekizitu ka matadalan programa Uma Kbiit Laek nian.
Uma kbit laek hanesan programa Governu konstituisional da VIII liuhosi PNDS hodi korresponde ho Planu Estratéjiku Dezenvolvimentu Nasionál (PEDN) 2011-2030.
Programa ne’e atu rekoñese povu Timor-Leste nia aspirasaun atu harii nasaun ne’ebé forte, prósperu no fó-moris di’ak, hodi redús pobreza no garante ema hotu hetan oportunidade hetan rai no uma hodi bele tulun nia hala’o moris ho dignu no seguru.
“Hau hanoin governu nia polítika ne’e di’ak, tanba bele hadi’ak povu nia moris, liuliu sira-ne’ebé kiak no mukit hosi família dezaraska atu sustenta no apoiu ba nia moris,” Xefe suku Alípio dehan.
Enkuantu Programa Nasionál Dezenvolvimentu Suku (PNDS) konstrui UKL regulár iha munisípiu Bobonaro hamutuk unidade 459 kobre suku aldeia 193, suku 50, postu administrativu neen.
Notísia relevante: PNDS sei konstrui UKL unidade 459 iha Bobonaro
Jornalista: Sérgio da Cruz
Editór: Evaristo Soares Martins
