Top

CARE-UNITAL dezenvolve parseria promove kualidade edukasaun no redús VBJ

Logotipu UNITAL. Imajen/Espesiál

DILI, 20 dezembru 2022 (TATOLI)—Organizasaun CARE Internasionál ho Universidade Orientál Timor Lorosa’e (UNITAL) dezenvolve ona parseria atu promove kualidade edukasaun no redús Violénsia Bazea ba Jéneru (VBJ) ba komunidade iha área rurál.

“Bazeia ba kompromisu komun atu hadi’ak kualidade edukasaun no redús violénsia bazea ba jéneru (VBJ) ba komunidade iha área rurál no promove igualdade jéneru iha Timor-Leste. Entidade rua ne’e asina ona Memorandu Entendimentu ba estudante UNITAL hosi departamentu Edukasaun no Sosiolojia atu hala’o sira-nia estájiu iha área rurál sira iha Ainaro, Ermera no Manatuto,” Reitór UNITAL, Florindo Pereira, hateten liuhosi komunikadu imprensa ne’ebé mak Agência Tatoli asesu, tersa ne’e.

Tanba liuhosi estudante sira-nia estajiu mak sei hasa’e sira nia abilidade no CARE mós atu hasa’e sira-nia koñesimentu kona-ba protesaun labarik, jéneru no prevensaun violénsia bazea ba jenéru (VBJ).

“Investe ba foinsa’e sira importante tebes atu hetan impaktu ne’ebé boot. Ho nune’e, CARE iha kompromisu atu apoiu estudante sira-ne’ebé mak selesionadu atu aplika teoria ne’ebé sira apreende ba iha servisu pratiku, hadi’ak sira-nia abilidade molok sira tama ba forsa traballu,” nia dehan.

Diretór Country Care Internasional Timor-Leste, Peter Goodfellow, hateten CARE servisu ho komunidade iha área rurál no hamutuk ho parseiru sosiedade sivil sira atu luta hasoru dezigualdade jéneru, tanba ida-ne’e hatudu ona katak dalan efetivu ida atu kria impaktu ba dezenvolvimentu ne’ebé sustentavél.

Asegura moris di’ak no rona feto no labarik feto sira nia lian iha área rurál no dezvantajen sai nu’udar sentru ba CARE Internasionál nia servisu, ida-ne’e atinje liuhosi área prioridade haat hanesan edukasaun, hakbiit feto sira-nia ekonómia, saúde no promove feto sira-nia lian iha sosiedade liuhosi programa dezenvolvimentu no umanitáriu sira.

Kona-ba Programa Edukasaun no Nutrisaun HATUTAN hetan apoiu finansiamentu hosi Departamentu Agrikultura, no atividade koordenadu liuhosi Embaixada Estadu Unidu Amérika (EUA) iha Timor-Leste.

Programa HATUTAN implementa liuhosi CARE Internasionál, Mercy Corps no WaterAid iha parseria ho Ministériu Edukasaun, Juventude no Desportu (MEJD), Ministériu Saúde, Ministériu Administrasaun Estatál no Ministériu Agrikultura no Peska.

Programa ne’e hala’o tuir orientasaun hosi Memorandu Entendimentu ida entre MEJD no CARE. Programa Edukasaun no Nutrisaun HATUTAN iha objetivu atu hadi ak liután literásia ba labarik sira, idade eskola nian no hadi’ak prátika saúde, nutrisaun no dieta sira iha eskola no komunidade sira liu-liu área rurál.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!