Top

CI atribui karteira profisionál ba jornalista 18

Conselho de Imprensa (CI) atribuí karteira profisionál ba jornalista 18 hosi mídia nasionál, iha salaun Delta Nova, Dili. Imajen Tatoli/Osória Marques.

DILI, 22 dezembru 2022 (TATOLI)–Conselho de Imprensa (CI) Timoe-Leste, kinta ne’e, atribui karteira professional ba jornalista na’in-18 hosi mídi nasionál iha Timor-Leste.

Prezidente Interinu Konsellu Imprensa (KI), Francisco Simões da Costa Belo, hateten valór no títilu karteira profsionál mak esperansa Conselho de Imprensa (CI) ba jornalista sira iha Timor-Leste.

“Karteira profisionál ne’ebé mak ita-boot sira simu ne’e bainhira la folin se ita-boot sira rai de’it, maibé folin liu mak bainhira imi hatudu iha imi-nia atividade produtu jornalístiku. Ida-ne’e mak fó valór karteira peofisionál no títulu hanesan jornalista. Ida-ne’e mak sai esperansa boot hosi Konsellu ba ita-boot sira hotu,” Francisco Simões da Costa Belo hateten ba jonalista sira hafoin atribui karteira profisionál ba jornalista 18 iha salaun Delta Nova.

Profisaun nu’udar jornalista la’ós kna’ar baibain ida, tanba jornalista hala’o kna’ar ho profisionál no profesionál ne’e hatudu hosi produtu jornalístiku no abilidade sira-ne’ebé públika iha meiu komunikasaun sosiál.

Tanba ne’e, jornalista ida tenke hatudu ninia atetude, produtu, rezultadu servisu, nune’e públiku bele fó apresiasaun ba jornalista ida-nia produtu.

Reprezentante jornalista sira-ne’ebé simu karteira profisionál, Rosa Prega Ximenes, hateten liuhusi formasaun ne’ebé KI oferese bele kapasita di’ak liután sira-nia koñesimentu kona-ba oinsá sai jornalista profisionál iha área jornalístiku.

“Liuhusi kolokiu ne’e forma ami oinsá sai jornalista ne’ebé defende sidadaun nia direitu ba informasaun. No liuhosi formasaun no sai profisionál ne’e tenke brani hodi kombate diskriminasaun ho forma hotu ne’ebé iha no bainhira sai jornalista peofisionál tenke kumpre nafatin lei komunikasaun sosiál ne’ebé estabelese ona,” nia dehan

Jornalista profisionál tenke badinas estuda, buka apreende no kaer metin prisipiu ne’ebé hateten katak atu garante independénsia, integridade ho kredibilidade komunikasaun sosiál, nune’e bele hakonu nesesidade públiku hodi hetan informasaun ne’ebé loos tanba komunikasaun sosiál ezije profisionalizmu no nakloke ba públiku.

“Espera lori ami ida-idak atu kaer prisipiu ne’ebé mak iha no sai nafatin responsabilidade másima hodi bele fahe nafatin informasaun iha públiku ho loos, onestidade, imparsialidade no independénsia. No esperansa hosi ami mak Konsellu Imprensa ba oin suseseu liután no orden nafatin ita-nia planu tuir nesesidade jornalista ne’ebé iha,” nia hateten.

Agradese ba KI no formadór sira ne’ebé kapasita ona jornalista 18 hodi loke kolokiu ba formasaun jornalista nian.

Jornalista na’in-18 ne’ebé simu karteira profisionál hanesan Herculano Gomes,hosi Televizaun Edukasaun (TVe), Santina Castro de Jesus hosi Suara Timor Lorosa’e (STL) Domingas Soares hosi STL, Maria Olinda Tavares hosi STL, Joaninha Belo Marques hosi STL, Natalina Loles hosi STL, Efizenia da Costa hosi STL, Donasiano Magalhães, hosi STL.

Sidónio Fernandes hosi Rádio Komunidade Comoro, Madalena Alves hosi Rádio Komunidade Comoro, Arnaldo Afonso hosi Rádio Komunidade Comoro, Júlia da Costa hosi Grupu Mídia Nasionál (GMN), Longuinhos Costa dos Reis hosi GMN, Felizita da Silva hosi GMN, Justino Simões hosi GMN, Rosita de Carvalho hosi GMN, Rosa Prega Ximenes hosi Rádio Televizaun Timor-Leste (RTTL), Jacinto Fernandes Xavier hosi GMN.

Jornalista : Osoria Marques

Editór      : Cancio Ximenes

Publisidade

Leave a Reply

Latest Post

error: Content is protected !!