Top

“Hela iha Fatuhada maibé naran seidauk tama baze dadus”

Reklamante hosi Aldeia 02, suku Fatuhada, Afonso Adelaide Pereira. Imajen Tatoli/Osória Marques.

DILI, 22 dezembru 2022 (TATOLI)—Reklamante hosi Aldeia 02, suku Fatuhada, postu administrativu Dom Aleixo, munisípiu Dili, Afonso Adelaide Pereira, hateten nia hela iha suku Fatuhada dezde tempu Indonézia nian maibé naran seidauk tama baze dadus Governu nian liu-liu Ministériu Administrasaun Estatál (MAE).

“Ami naran laiha ne’e tanbasá, ami Estadu ketak ka oinsa. Ha’u hela iha Fatuhada kle’ur ona dezde hosi tempu Indonézia nian mai to’o agora, ha’u naran laiha fali depois ha’u iha fixa família no dokumentu sira seluk iha hela. Atu kompleta tan saida mak ha’u-nia naran tama fali iha lista reklamasaun,” nia dehan ba jornalista sira, iha sede suku Fatuhada, Dili, seste ne’e.

Nia dehan, la’ós foin simu subsídiu fim do ano mak naran tama iha lista reklamasaun nian maibé naran ida-ne’e desde progama apoiu ba família ne’ebé rendimentu kiik sira durante pandemia COVID-19 nian mós sai benefisiáriu reklamante.

Tanba ne’e nia ezije Governu presiza hadi’a sistema no administrasaun iha parte relevante nian nune’e labele mosu lista reklamante hela de’it.

“Tanba ne’e ha’u husu ba xefe suku ne’e, ida-ne’ebé mak sala, ha’u lahatene, xefe mak sala ka Governu mak sala. Ha’u la fó sala maibé ha’u husu ba ha’u-nia xefe, ha’u naran iha ka lae. Xefe suku dehan ó naran laiha. Ó ukun ha’u tanbasá mak naran laiha, ha’u husu tanba nia mak ha’u-nia xefe,” nia esplika.

Afonso hatutan karik naran laiha aban bainrua sei tuir vota ka oinsá, se la tuir vota labuat ida maibé karik tuir vota entaun konsidera mós povu sira-ne’e.

“Ami naran laiha vota saugate de’it tanba xefe suku ne’ebé fó ami fó vota ne’e dehan ami naran laiha, ami agradese tanba naran laiha,” nia dehan.

Entrantu xefe suku Fatuhada, postu administrtativu Dom Aleixo, munisípiu Dili, Marcelino Soares, preokupa ho sistema no administrasaun iha MAE no MSSI nian.

“Tuir loloos buat ne’e la’o di’ak, mak administrasaun ne’e loos hosi nasionál to’o iha lokál. Ami alista komunidade bazea ba resensiamentu, depois lista sira ami hatama bazea mós ba programa $200 pandemia COVID-19 nian no ho cesta bázika nian,” nia dehan.

Tanba, tuir nia, selu tuir lista eletróniku ne’ebé mak simu hosi Governu ne’e no bainhira prosesu pagamentu ne’e la’o mak iha benefisiáriu balun mak naran laiha, parte autoridade lokál aneksa lista reklamante sira ho lista eletróniku hosi Governu.

“Foin daudauk tun fali mai lista reklamante ne’ebé aneksa ho lista eletróniku ne’e, naran la mai. Entaun reklamasaun nafatin hela de’it. Ne’ebé tuir loloos ne’e MSSI ho MAE bolu ami xefe sira para koordena malu, katak lista ne’e loos ona ka lae nune’e ita hatene katak loos ona. Tanba ne’e presiza administrasaun ne’ebé di’ak, nune’e prosesu bele la’o di’ak,” nia esplika.

Maibé, esforsu nafatin atu benefisiáriu ne’ebé mak tama lista reklamante mós heta direitu maibé nia sei atende hotu benefisiáriu sira bainhira ema simu hotu ona.

Xefe família iha suku Fatuhada, postu administrativu Dom Aleixo, munizípiu Dili, hamutuk 3.111 ne’ebé hela iha aldeia lima, nune’e Governu aloka osan $622.200 atu bele selu benefisiáriu sira.

Jornalista : Osoria Marques

Editór      : Cancio Ximenes

Publisidade

Leave a Reply

Latest Post

error: Content is protected !!