DILI, 22 dezembru 2022 (TATOLI)–Diretór Eskola Ensinu Sekundáriu Tékniku Vokasionál (ESTV) Hera, António Pinto, hateten, Ministériu Edukasaun Juventude no Desportu (MEJD) to’o agora seidauk foti medida ruma atu normaliza kondisaun mota Hera.
“Ha’u hakarak dehan antes ne’e mota sobu ona ami-nia sala ida inklui hariis fatin iha edifísiu departamentu komérsiu, daudaun hahú fó ameasa ba ami-nia edifísiu departamentu kontabilidade. Tanba ne’e, ami husu ba Governu atu halo lalais intervensaun ruma hodi normaliza tiha kondisaun mota,” Diretór Eskola informa ba Agência Tatoli, iha ninia knaar fatin, Eskola ESTV Hera, kinta ne’e.
Notísia relevante: MEJD orienta ona reabilita morru protesaun iha eskola ESTV Hera
Tuir Dirijente ne’e, edifísiu departamentu kontabilidade iha ESTV Hera ne’e nia distánsia sorin hela de’it 30cm ba mota, nune’e bainhira udan tun maka’as tan iha semana ida-ne’e bele sobu ona sala aula sorin. Tanba ne’e parte eskola rekomenda ba MEJD atu halo netik asaun ruma atu edifísiu di’ak ne’e labele hetan tan ameasa.
Maibé tuir Ministru Edukasaun Juventude no Desportu, Armindo Maia, antes ne’e nia rasik orienta ona Diresaun Nasionál Dezenvolvimentu Parke Eskolár (DNDPE) atu halo intervensaun molok udan tun maka’as hodi bele kria lalais barreira ruma hodi satán mota ne’ebé tun atu labele lori ameasa ba eskola TEKVOK Hera.
“Ha’u rasik antes ne’e orienta ona ita-nia Diresaun Nasionál Dezenvolvimentu Parke Eskolár atu prepara harii bronje ruma hanesan barreira ida atu normaliza tiha mota kiik Hera atu labele fó ameasa ba eskola, maibé ita rona fali katak Ministériu Obra Públika iha ona planu atu harii barreira iha mota Hera, entaun ita kansela tiha planu ne’e,” nia tenik.
Daudaun Diresaun Obra Públika toma konta ona mota Hera no sira maka sei kria kondisaun ruma atu asegura kondisaun eskola.
Jornalista : Tomé Amado
Editora : Julia Chatarina
