STAE elimina ona kartaun eleitorál ema mate hamutuk 1.273

DILI, 28 dezembru 2022 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten durante halo Resensiamentu Eleitorál (RE) ho Atualizasaun Baze Dadus iha territóriu nasionál ne’e, STAE elimina ona kartaun eleitorál ema mate hamutuk 1.273 ne’ebé kompostu hosi feto 564 no mane 709.
“Iha prosesu atendimentu ne’e, ita mós halo eliminasaun eleitór sira-ne’ebé ema mate hamutuk 1.273,” Diretór Jerál ne’e hateten ba jornalista sira liuhosi konferénsia imprensa ne’ebé realiza iha salaun STAE, Dili, kuarta ne’e.
Aleinde STAE rejista ema mate, nia dehan, STAE mós identifika kartaun eleitorál ne’ebé mak dupla hamutuk 187 ne’ebé kompostu hosi mane hamutuk 140 no feto iha na’in-47.
Hosi 187 ne’e maihosi munisípiu Covalima ida (1), Dili ida (1), Ermera 13, Laútem ida (1), Liquiça 54, Manatuto 43, Rejiaun Administrativa Espesiál Oé-Cusse (RAEOA) haat (4) no Viqueque 70.
STAE konsege elimina kartaun eleitorál hirak-ne’e tanba STAE servisu hamutuk ho lideransa komunitária iha territóriu nasionál.
“Ida-ne’e tanba ita servisu no halo koordenasaun ho lideransa komunitária no família, nune’e aprezenta evidénsia sira, ikus mai ita kruza iha ita-nia sistema,” nia dehan.
Ho nune’e, STAE sinkroniza iha observadór sentrál iha Dili, to’o iha dezembru nia rohan, eleitór ne’ebé mak resensiadu no atualizadu hamutuk 878.656 no númeru ida-ne’e inklui ona ho eleitór siea iha diáspora.
Númeru, eleitór to’o iha fulan-dezembru 2022 hamutuk 878.656 kompostu hosi 878.712 no diáspora 6.944.
Jornalista : Osoria Marques
Editór : Cancio Ximenes

