Top

PAM Dili husu komunidade hato’o keixa bainhira koveiru halo kobransa

Prezidente Autoridade Munisípiu Dili, Guilhermina Filomena Saldanha Ribeiro. Imajen Tatoli/Antonio Daciparu.

DILI, 03 janieru 2023 (TATOLI)—Prezidente Autoridade Munisípiu (PAM) Dili, Guilhermina Filomena Saldanha Ribeiro, husu ba komunidade hato’o keixa ba PAM Dili bainhira koveiru sira kee rai-koak halo kobransa ba família matebian hodi haloot mate iha semitériu públiku.

“Horisehik ami hato’o ona ami-nia karta komunikadu ida katak laiha orsamentu ida hosi família matebian atu selu ba koveiru sira hodi kee rai-koak Sei gratuita tanba laiha baze legál no laiha orientasaun ruma atu koveiru sira husu osan ba família matabian bainhira husu atu kee rai-koak ba ema mate ruma atu halot,” PAM Dili ne’e hateten ba jornalista sira, hafoin partisipa serimónia entrega servisu hosi Komandante PNTL sesante Munisípiu Dili, Superintendente Xefe Henrique da Costa ba Komandante Munisípiu Dili, Superintendente Xefe Natércia Martins, iha salaun Komandu PNTL Caicoli, kuarta ne’e.

Tuir nia, Governu kontrata no selu koveiru sira iha semitériu públiku atu kee rai-koak no hakohi la’ós família matebian sira ba selu fali koveiru no koveiru sira husu osan ba família matebian sira.

“Ami presiza keixa hosi vítima sira, labele ko’alia de’it. Ezemplu, António mak husu osan, ida-ne’e para ami bele foti asaun. Tanba saida mak saúde gratuita ona, ema mate atu hatama ba rai-koak ne’e tenke selu. Buat hotu sei gratuita no karik iha pagamentu Governu halo baze legál ruma,” nia dehan.

Koordenadór Simitériu Munisípiu Dili, Inocêncio da Silva, hateten informasaun selu ema sira (koveiru) kee rai-koak ho montante boot ne’e la loos maibé dala ruma família matebian sira mak hakarak fó sira-nia kolen ne’e mak akontese.

“Iha ne’e sempre mosu fallansu balun tanba ita ne’e ema-ne’ebé mak la hanesan hotu. Tanba, iha balun mai kee rai-koak de’it no iha balun mai fó osan maibé la signifika selu, fó sira-nia kolen. Maibé ami simu fali informasaun dehan ema selu ami $1.000 mai kraik, ha’u hanoin ida-ne’e la loos,” nia dehan.

Tanba ne’e, nia husu ba ema-ne’ebé mak halekar informasaun iha mídia sosiál ne’e tenke klarifika ba públiku katak ema selu ne’e mak sé no osan ne’ebé selu ne’e hira.

“Ami kee rai-koak ne’e la obriga sira (famílai matebian) atu selu ami, maibé sira hakarak fó ami simu tanba kolen. No, ida-ne’e sira mai koordena ho ami katak ita-boot sira mak kee entaun ami kee maibé karik sira na’in rasik hakarak kee, bele hela,” nia hateten.

Maibé, nia dehan, depende ba família matebian sira hakarak fó hira hanesan fó $100 mós bele no osan ne’e fahe tiha kedas ba ekipa kee rai-koak ne’e.

“Ami fahe mós dala ruma ema ida hetan $3 no sae liu mak $20, tanba iha ne’e ema na’in ualu (8) kontratadu no na’in haat mak permanente,” nia esplika.

Tanba, nia informa, materiál kontrusaun ba kee rai-koak hanesan aisuak, rai-henek, simente, besi no bee-moos ne’e Governu mak prepara hotu.

Jornalista : Osória Marques

Editór      : Cancio Ximenes

Publisidade

Leave a Reply

Latest Post

error: Content is protected !!